NEET दोनदा घ्या; JEE परीक्षेच्या वेळेत बदल करा; CFI ची केंद्र सरकारकडे मागणी
कोचिंग फेडरेशन ऑफ इंडियाने वर्षातून दोनदा NEET परीक्षा घेण्याचा सल्ला दिला आहे. तसेच जेईई मेनबाबतही बोर्डाची परीक्षा संपल्यानंतर वेळापत्रक ठरवावे, अशी सूचना करण्यात आली आहे.
eduvarta@gmail.com 
एज्युवार्ता न्यूज नेटवर्क
NEET UG पेपर लीक (Paper leak) आणि UGC-NET रद्द झाल्यानंतर परीक्षांच्या नियोजनावर गंभीर प्रश्न उपस्थित झाले आहेत. याबाबत सुरू असलेल्या वादाच्या पार्श्वभूमीवर देशभरातील कोचिंग संस्थांची संघटना असलेल्या कोचिंग फेडरेशन ऑफ इंडिया (CFI)ने पेपर लीक प्रकरणाचा निषेध करत केंद्रीय शिक्षण मंडळाकडे (Central Board of Education) काही सूचना सादर केल्या आहेत.
CFI ने विद्यार्थ्यांचा ताण कमी करण्यासाठी, वर्षातून दोनदा NEET परीक्षा घेण्याचा सल्ला दिला आहे. तसेच जेईई मेनबाबतही बोर्डाची परीक्षा संपल्यानंतर वेळापत्रक ठरवावे, अशी सूचना करण्यात आली आहे. विद्यार्थ्यांना एकाच वेळी दोन्ही परीक्षांवर लक्ष केंद्रित करणे कठीण जाते. बोर्डाच्या निकालापूर्वी प्रवेश परीक्षांचे निकाल जाहीर केले जातात, असेही महासंघाचे म्हणणे आहे. त्यामुळे विद्यार्थ्यांना बोर्डाच्या परीक्षेवर लक्ष केंद्रित करण्यात अडचण येत आहे. दबावाखाली अनेक विद्यार्थी आत्महत्येसारखे चुकीचे पाऊलही उचलतात. याशिवाय बोर्डाच्या परीक्षा १० मार्चपर्यंत पूर्ण कराव्यात, असेही सांगण्यात आले आहे. तसेच, जेईईची पहिली परीक्षा एप्रिलच्या पहिल्या आठवड्यात आणि त्यानंतर महिनाभरानंतर जेईईची दुसरी परीक्षा घ्यावी.
दरम्यान, पेपरफुटी थांबवण्यासाठीच्या सूचनांच्या यादीत काही लोकांनी संपूर्ण कोचिंग इंडस्ट्रीला चुकीचे काम करणाऱ्या माफिया म्हणत असल्याबद्दल फेडरेशनने नाराजी व्यक्त केली आहे. प्रसिद्धी मिळवण्यासाठी पेपरफुटीचा वापर करणाऱ्या, विद्यार्थ्यांच्या भावनांचे भांडवल करणाऱ्या आणि राजकारण करणाऱ्या संस्थांवरही टीका केली आहे.
