पुण्यात पुन्हा कोयत्याची दहशत; स्पर्धा परीक्षेची तयारी करणाऱ्या विद्यार्थ्यांवर हल्ला

एज्युवार्ता न्यूज नेटवर्क

Pune News : पुणे शहरातील कोयता गँगची (Koyta Gang) दहशत कमी होताना दिसत नाही. काही दिवसांपुर्वीच भर दिवसा एक विद्यार्थिनीवर कोयत्याने हल्ला झाला होता. त्यानंतर पुन्हा एकदा स्पर्धा परीक्षेचा (Competitive Examination) अभ्यास करणाऱ्या विद्यार्थ्यावर बुधवारी पहाटे हल्ला करण्यात आल्याची घटना घडली आहे. याप्रकरणी पोलिसांनी (Pune Police) तातडीने तपासची सुत्रे हलवत तिघांना अटक केली आहे. पैसे दिले नाहीत म्हणून हा हल्ला झाल्याची माहिती पोलिसांनी दिली.

आदित्य जीवन गायकवाड, साहिल शंकर वाघमारे व अनिकेत संग्राम सरोदे (तिघे रा. पानमळा वसाहत, सिंहगड रस्ता, पुणे) अशी अटक केलेल्या आरोपींची नावे आहेत. या तिघांवरही यापूर्वीही गंभीर गुन्हे दाखल आहेत. मुळचा नांदेडचा असलेल्या १९ वर्षीय बालाजी यल्लापा आरोटे याने विश्रामबाग पोलिस ठाण्यात फिर्याद दिली आहे.

रँगिंगप्रकरणी एकाचवेळी तब्बल ७२ विद्यार्थ्यांवर कारवाई; दहा जण निलंबित 

आरोटे हा त्याचे मित्र कुणाल शेवाळे व ओम भिलारे यांच्यासह सदाशिव पेठेतील खजिना विहिर चौकातील एकाक्ष अभ्यासिकेत अभ्यास करतात. तिघेही बुधवारी पहाटे अडीच वाजण्याच्या सुमारास अभ्यासिकेतून घरी जाण्यासाठी निघाले होते. टिळक रस्त्यावर शक्ती स्पोर्ट्स दुकानासमोहर आल्यानंतर त्यांच्यामागून एक दुचाकी आली. त्यावरील एकाने खाली उतरत तिघांना अडविले आणि पैशांनी मागणी केली. त्यांच्यात वाद झाल्यानंतर पैसे देत नसल्याच्या रागात तिघांवर कोयत्याने हल्ला करण्यास सुरूवात केली. मात्र तिघांनी आरडाओरडा केल्यानंतर दुचाकीवरून आरोपी पसार झाले.

सुदैवाने या हल्ल्यात आरोटेसह त्याच्या तीनही मित्रांना गंभीर दुखापत झाली नसल्याचे पोलिसांनी सांगितले. दरम्यान, घटनेनंतर विश्रामबाग पोलिसांचे पथक तातडीने घटनास्थळी दाखल झाले. त्यानंतर परिसरातील सीसीटीव्ही फुटेज तपासून तीन जणांना पानमळा परिसरातून ताब्यात घेण्यात आले. तिघांना खुनाच्या गुन्ह्याचा प्रयत्न केल्याचा गुन्हा दाखल करण्यात आला आहे.