प्रियदर्शनी स्कूल गुणवत्तापूर्ण शिक्षणाबरोबर उत्तम संस्कार देणारी शाळा - अभिनेता कुशल बद्रिके यांचे गौरवउद्गार 

एज्युवार्ता न्यूज नेटवर्क 

 माहिती तंत्रज्ञानाच्या युगात जग झपाट्याने पुढे जात असून त्यात आपल्या भावी पिढीला या स्पर्धेत टिकवून ठेवण्यासाठी गुणवत्तापूर्ण शिक्षण देणे हाच एक मार्ग आहे. त्यात प्रियदर्शनी ग्रुप ऑफ स्कूल हजारो विद्यार्थ्यांना दर्जेदार शिक्षण देऊन नव्या पिढीला घडवण्यात मोठा वाटा उचलत आहे. या शाळेत केवळ चांगले शिक्षणच नाही तर उत्तम संस्कार सुद्धा दिले जातात,असे गौरवउद्गार प्रसिद्ध अभिनेता कुशल बद्रिके यांनी प्रियदर्शनी ग्रुप ऑफ स्कूलबद्दल काढले.

प्रियदर्शनी ग्रुप ऑफ स्कूल्सतर्फे स्वर्गीय श्रीमती नवल इंद्रमन सिंग यांच्या 78 व्या जयंतीनिमित्त आयोजित ‘जागर स्त्री शक्तीचा, सन्मान आईचा’ या विशेष कार्यक्रमात कुशल बद्रिके बोलत होते. यावेळी प्रियदर्शनी ग्रुप ऑफ स्कूल्सच्या संस्थापक सौ. तरुणा इंद्रमन सिंह, व्यवस्थापकीय विश्वस्त डॉ. राजेंद्र सिंह, डॉ. जितेंद्र सिंह, महेंद्र सिंह, नरेंद्र सिंह आणि सरिता सिंह यांच्यासह माजी नगरसेवक विलास मडिगेरी तसेच विविध क्षेत्रांतील मान्यवर उपस्थित होते.या प्रसंगी ‘चला हवा येऊ द्या’ या लोकप्रिय कार्यक्रमातून घराघरात पोहोचलेल्या कुशल बद्रिके आणि श्रेयस बुगडे या कलाकारांनी विनोदी कार्यक्रम सादर करून हास्याचे फवारे फोडले.सभागृहात उपस्थित प्रेक्षकांनी या कार्यक्रमाच्या माध्यमातून आनंदाची मेजवानी लुटली.

कुशल बद्रिके मनोगत व्यक्त करताना म्हणाले, प्रियदर्शनी ग्रुप ऑफ स्कूल्सचे सर्व विश्वस्त व संचालक स्वर्गीय श्रीमती नवल इंद्रमन सिंग यांच्या 78 जयंती निमित्त एवढा मोठा कार्यक्रम आयोजित करतात ही खूप अभिमानाची बाब आहे.आपल्या आई बद्दलचे प्रेम व्यक्त करण्याची, तिची आठवण कायम मनात ठेवण्याची जाणीव ही चांगल्या संस्कारातून प्राप्त होते.संस्थेचे संचालक या भावनेतून कार्यक्रम आयोजित करत असल्याने आपोआप शाळेतील मुलांपर्यंत हे संस्कार पाझरत जाणार आहेत.त्यामुळे शाळेचे कौतुक करावे तेवढे थोडे आहे. 

श्रेया बुगडे म्हणाल्या, प्रियदर्शनी स्कूलमध्ये सुमारे 17 हजार विद्यार्थी शिक्षण घेत आहेत. एक प्रकारे उज्ज्वल भारत घडवण्याचे काम ही शाळा करत आहे. या शाळेत प्रवेश घेतलेल्या मुलांच्या पालकांना कोणतीही चिंता करण्याची आवश्यकता नाही. अत्यंत योग्य व्यक्तींच्या हातात तुमच्या मुलांचे भवितव्य आहे. 

माजी नगरसेवक विलास मडिगेरी यांनी स्व. नवल इंद्रमन सिंह यांच्या जीवनकार्याला श्रद्धांजली अर्पण करताना समाज आणि कुटुंबव्यवस्थेच्या जडणघडणीत महिलांचे योगदान अनमोल असल्याचे सांगितले.

या कार्यक्रमात स्व. नवल इंद्रमन सिंह यांच्या कार्याला भावपूर्ण अभिवादन करण्यात आले. कार्यक्रमाच्या समारोपावेळी उपस्थितांनी मातृत्व, स्त्रीशक्ती आणि निस्वार्थ सेवाभाव जपणाऱ्या सर्व महिलांप्रती कृतज्ञता व्यक्त केली.सुमारे 600 हून अधिक पालक, विद्यार्थी, शिक्षक आणि नागरिकांनी या कार्यक्रमास उपस्थिती लावली.