ITI Admission : बंद तुकड्यांना पसंतीक्रम दिला नाही ना? दुरुस्तीसाठी उरले आठ दिवस
शासकीय संस्थांमध्ये (Government ITI) ९५ हजार आणि खासगी संस्थांमध्ये (Private ITI) ५९ हजार जागांसाठी प्रवेश प्रक्रिया राबविली जात आहे.
eduvarta@gmail.com 
एज्युवार्ता न्यूज नेटवर्क
व्यवसाय शिक्षण व प्रशिक्षण संचालनालयाकडून (DVET) राज्यातील शासकीय व खासगी औद्योगिक प्रशिक्षण संस्थांमध्ये (ITI) प्रवेशासाठी ऑनलाईन प्रक्रिया (Centralised Admission Process) सुरू आहे. मात्र, ही प्रक्रिया सुरू झाल्यानंतर संचालनालयाने नुकताच १५२ तुकड्या बंद करण्याचा निर्णय घेतला आहे. पण तोपर्यंत अनेक विद्यार्थ्यांनी बंद पडलेल्या तुकड्यांसाठी पसंतीक्रम नोंदविले होते. या विद्यार्थ्यांना पसंतीक्रम बदलावे लागणार आहे. आता त्यासाठी तसेच अद्याप नोंदणी न केलेल्या विद्यार्थ्यांना अर्ज भरण्यासाठी केवळ आठ दिवसांचा कालावधी उरला आहे. (Maharashtra ITI Admission Process)
येत्या शैक्षणिक वर्षासाठी आयटीआयच्या जवळपास दीड लाख जागा उपलब्ध आहेत. त्यामध्ये शासकीय संस्थांमध्ये (Government ITI) ९५ हजार आणि खासगी संस्थांमध्ये (Private ITI) ५९ हजार जागांसाठी प्रवेश प्रक्रिया राबविली जात आहे. विद्यार्थ्यांना दि. १२ जुनपासून ऑनलाईन अर्ज भरणे, अर्ज निश्चिती तसेच पसंतीक्रम नोंदविण्यासाठी सुविधा उपलब्ध करून देण्यात आली आहे. तर ११ जुलैपर्यंत अर्ज भरणे, अर्जात दुरूस्ती करणे, शुल्क भरणे आणि कागदपत्रांची तपासणी करून अर्ज निश्चिती करता येणार आहे. विद्यार्थ्यांना १२ जुलैपासून पहिल्या प्रवेश फेरीसाठी व्यवसाय व संस्थानिहाय विकल्प प्राधान्य सादर करावे लागणार आहेत.
महत्वाची बातमी : बोर्डाला काढावी लागणार दहावी-बारावीची मेरिट लिस्ट
ही प्रक्रिया सुरू असतानाच संचालनालयाने २८ जुन रोजी परिपत्रक काढून शासकीय आयटीआयमधील १३८ आणि खासगी संस्थांमधील १४ तुकड्या अशा एकूण १५२ तुकड्या बंद करण्यात आल्याचे सांगण्यात आले. तसेच बंद करण्यात आलेल्या तुकड्यांचा सद्यस्थितीत प्रवेश प्रक्रियेत समावेश करण्यात आला होता. या तुकड्या बंद केल्यामुळे त्या तुकड्यांमध्ये ज्या उमेदवारांनी आपला प्राधान्यक्रम नोंदविलेला आहे, त्यांनी आपले प्राधान्यक्रम पुन्हा सुधारित करून नोंदवावे, असे आवाहनही संचालनालयाकडून करण्यात आले आहे. त्यामुळे विद्यार्थ्यांना पसंतीक्रमांमध्ये बदल करावे लागणार आहेत. अन्यथा अपेक्षित संस्थेमध्ये प्रवेश मिळणार नाही.
ऑनलाईन प्रवेशप्रक्रियेसाठी संकेतस्थळ – https://admission.dvet.gov.in
आयटीआय प्रवेशप्रक्रियेचे वेळापत्रक
ऑनलाईन प्रवेश अर्ज भरणे, अर्जात दुरुस्ती करणे व प्रवेश अर्ज शुल्क जमा करणे – दि. १२ जून ते ११ जुलै
अर्ज स्वीकृती केंद्रात मूळ कागदपत्रांच्या तपासणीनंतर प्रवेश अर्ज निश्चित करणे – दि. १९ जून ते ११ जुलै
पहिल्या प्रवेश फेरीसाठी व्यवसाय व संस्थानिहाय विकल्प प्राधान्य सादर करणे – दि. १९ जून ते १२ जुलै
प्राथमिक गुणवत्ता यादी प्रसिध्द करणे – दि. १३ जुलै (स. ११ वाजता)
गुणवत्ता यादीबाबत हरकती नोंदविणे व प्रवेश अर्जातील माहितीत बदल करणे – दि. १३ व १४ जुलै
अंतिम गुणवत्ता यादी प्रसिध्द करणे – दि. १६ जुलै
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
