बाल शिक्षण मंदिरात शिक्षक दिन उत्साहात साजरा

एज्युवार्ता न्यूज नेटवर्क 

 म. ए. सो. बाल शिक्षण मंदिर, डेक्कन जिमखाना, पुणे येथे शिक्षक दिन उत्साहपूर्ण वातावरणात साजरा करण्यात आला. ‘ज्ञानाचा प्रकाश देण्या, दिवा अखंड जळतो; जीवनाचा खरा अर्थ शिक्षकांमुळेच कळतो’ या भावनेतून विविध उपक्रमांचे आयोजन करण्यात आले.

कार्यक्रमाच्या प्रारंभी शाळेच्या मुख्याध्यापिका सौ. मोनिका खेडलेकर यांच्या हस्ते भारताचे माजी राष्ट्रपती व महान शिक्षणतज्ज्ञ डॉ. सर्वपल्ली राधाकृष्णन यांच्या प्रतिमेचे पूजन करण्यात आले. यावेळी मुख्याध्यापिकांनी सर्वांना शिक्षक दिनाच्या शुभेच्छा दिल्या.

शिक्षक दिनाचे औचित्य साधून इयत्ता चौथीच्या विद्यार्थ्यांनी शिक्षकांची भूमिका स्वीकारत अध्यापनाचा अनुभव घेतला. नेहमीप्रमाणे परिपाठासाठी विद्यार्थी एकत्र आले; मात्र यावेळी संपूर्ण परिपाठ विद्यार्थ्यांनीच घेतला. इयत्ता चौथीतील कृष्णाई घैसास हिने मुख्याध्यापिकेच्या भूमिकेत मनोगत व्यक्त केले. विशेष म्हणजे स्वयंम कनगुटकर याने शाळेच्या सेवकाची भूमिका पार पाडत शाळेची घंटाही वाजविली. विद्यार्थ्यांनी शिक्षकांच्या विविध जबाबदाऱ्या उत्साहाने पार पाडल्या.

या उपक्रमातील शिक्षक रूपी विद्यार्थ्यांचे मुख्याध्यापिका सौ. मोनिका खेडलेकर यांच्या हस्ते कौतुक करण्यात आले. विद्यार्थ्यांना शिक्षकांच्या कार्याची आणि जबाबदारीची प्रत्यक्ष अनुभूती मिळावी, हा या उपक्रमामागील उद्देश होता.

दरम्यान, शिक्षक दिनाचे औचित्य साधून ‘आई माझा पहिला गुरू’ या उपक्रमांतर्गत इयत्ता पहिलीच्या विद्यार्थ्यांनी मातृपूजन केले. भारतीय संस्कृतीमध्ये आईला अत्यंत महत्त्वाचे व पवित्र स्थान असून, आई ही प्रत्येक मुलाची पहिली गुरू असते. आईप्रती कृतज्ञतेचा भाव व्यक्त करण्याबरोबरच तिच्याप्रती आदर व संस्कार बालमनावर रुजविणे हा या उपक्रमाचा उद्देश होता.

विद्यार्थ्यांनी आईला ईश्वररूप मानून केलेल्या मातृपूजनातून कृतज्ञता, संस्कार आणि मातृप्रेमाचे मूल्य अधोरेखित झाले.

विविध शैक्षणिक व संस्कारक्षम उपक्रमांनी बाल शिक्षण मंदिरातील शिक्षक दिन उत्साहात, आनंदात आणि संस्मरणीय वातावरणात साजरा करण्यात आला.