सुट्टी नाहीच! शिक्षकांना प्रशिक्षण दिवाळीत दिले जाणार प्रशिक्षण; नोंदणी प्रक्रिया सुरू
महाराष्ट्र राज्यातील शिक्षकांना २०२६ च्या दिवाळी सुट्टीत 'सीनियर' आणि 'सिलेक्शन-ग्रेड' प्रशिक्षणाला सामोरे जावे लागण्याची शक्यता आहे, ज्यामुळे सुट्ट्यांच्या नियोजनाबाबत चिंता व्यक्त केली जात आहे.
Eduvarta
एज्युवार्ता न्यूज नेटवर्क
वर्षभर शाळेतील अध्यापन, परीक्षा, शैक्षणिक उपक्रम आणि प्रशासकीय जबाबदाऱ्या सांभाळल्यानंतर शिक्षकांना दिवाळीची सुट्टी ही विश्रांतीचा काळ असतो. मात्र यंदा ही सुट्टीही प्रशिक्षणात खर्ची पडण्याची शक्यता निर्माण झाली आहे. जनगणना ड्युटीमुळे वरिष्ठ आणि निवडश्रेणी प्रशिक्षणाचे वेळापत्रक लांबल्याने आता हे प्रशिक्षण नोव्हेंबरमधील दिवाळी सुट्टीत आयोजित करण्याचे नियोजन करण्यात आले आहे. प्रशिक्षणासाठी ऑनलाइन नोंदणीला सुरुवात झाली आहे. त्यामुळे शिक्षकांमध्ये नाराजी आणि संभ्रमाचे वातावरण पसरले आहे.
दरवर्षी जूनच्या पहिल्या आठवड्यात हे प्रशिक्षण घेण्यात येते. यंदा मात्र जनगणना कामासाठी शिक्षकांची नियुक्ती झाल्याने जूनमध्ये ते शक्य झाले नाही. परिणामी पुढे ढकलण्यात आलेले प्रशिक्षण आता दिवाळीच्या सुट्टीत घेण्याचा निर्णय झाला आहे. शिक्षकांच्या मते दिवाळी ही वर्षभराच्या धावपळीनंतर मिळणारी फक्त विश्रांती नसून, बाहेरगावी असलेल्या आई-वडिलांना भेटण्याची किंवा मुलांसोबत वेळ घालवण्याची संधी असते. त्यामुळे आवश्यक असले तरी या सुट्टीत प्रशिक्षण घेतल्याने आधीच केलेले कौटुंबिक नियोजन विस्कळीत होणार, अशी भावना व्यक्त होत आहे.
जनगणना ड्युटीमुळे प्रशिक्षण पुढे ढकलले गेले असेल, तर शिक्षकांच्या अडचणी लक्षात घेऊन वेळापत्रक निश्चित करावे, अशी मागणी जोर धरू लागली आहे. दिवाळी सुट्टी वापरण्याऐवजी विद्यार्थ्यांच्या परीक्षा संपल्यानंतर एप्रिल किंवा मे महिन्यात प्रशिक्षण आयोजित करण्याचा पर्याय शिक्षकांकडून सुचवला जात आहे. महाराष्ट्र राज्य प्राथमिक शिक्षक संघाचे अध्यक्ष बाळकृष्ण चोरमले यांनीही सेवांतर्गत प्रशिक्षण दिवाळीत न घेता एप्रिलमध्ये, परीक्षा संपल्यानंतर घेण्याची मागणी केली आहे.
प्रशिक्षण २०२६ साठी ऑनलाइन नोंदणीला सुरुवात झाली आहे. ३० नोव्हेंबर २०२६ पर्यंत आवश्यक अर्हताकारी सेवा पूर्ण करणारे शिक्षक यासाठी पात्र असतील. एप्रिल आणि मे २०२६ मध्ये नोंदणी केलेल्या पात्र शिक्षकांना पुन्हा नोंदणी करण्याची गरज नाही, असे स्पष्ट करण्यात आले आहे. जनगणनेचे काम शिक्षकांकडून करून घेतल्यानंतर आता त्यांच्या हक्काच्या दिवाळी सुट्टीवर प्रशिक्षणाचे नियोजन होत असल्याने प्रशासनाने वेळापत्रकाचा फेरविचार करावा, अशी मागणी संघटनांकडूनही होत आहे.
शिक्षकांनी दिलेल्या सेवेची दखल घेत आणि त्यांच्या कौटुंबिक गरजा लक्षात घेऊन प्रशिक्षण वेळापत्रकात लवचिकता आणणे आवश्यक आहे. एप्रिल-मे सारख्या योग्य कालावधीत ते आयोजित केल्यास शिक्षकांना विश्रांती मिळेल आणि प्रशिक्षणाची गुणवत्ताही वाढेल. प्रशासनाने या मागण्यांची दखल घेऊन योग्य निर्णय घ्यावा, अशी अपेक्षा शिक्षकांमधून व्यक्त होत आहे.
