CTET परीक्षेची तारीख जाहीर; १२ आणि १३ डिसेंबरला परीक्षा
Eduvarta
एज्युवार्ता न्यूज नेटवर्क
महाराष्ट्र शिक्षक पात्रता परीक्षा (TET) परीक्षेच्या तारखा पेपर फुटीनंतर अद्याप जाहीर झाल्या नसल्या तरी शिक्षकांसाठी समाधानकारक बातमी आहे. कारण केद्रीय माध्यमिक शिक्षण मंडळातर्फे (CBSE) घेण्यात येणाऱ्या केंद्रीय शिक्षक पात्रता परीक्षा (CTET) २०२६ च्या २२ व्या परीक्षेची तारीख जाहीर करण्यात आली आहे. ही परीक्षा येत्या १२ आणि १३ डिसेंबर २०२६ रोजी देशभरात आयोजित करण्यात येणार आहे.
सीबीएसईने सोमवारी (१४ सप्टेंबर) याबाबत सार्वजनिक सूचना प्रसिद्ध केली. शिक्षक पात्रता परीक्षा देणाऱ्या उमेदवारांसाठी परीक्षा शहर आणि परीक्षा दिनांकाची माहिती महत्त्वाची ठरणार आहे. प्रत्येक उमेदवाराला वाटप करण्यात आलेले परीक्षा शहर आणि परीक्षेची तारीख परीक्षेच्या १५ दिवस आधी CTET च्या अधिकृत पोर्टलवर उपलब्ध करून देण्यात येणार आहे.
दरम्यान, परीक्षा केंद्राची माहिती असलेले प्रवेशपत्र परीक्षेच्या दोन दिवस आधी CTET पोर्टलवर डाउनलोड करण्यासाठी उपलब्ध होईल. प्रवेशपत्रावर उमेदवाराला परीक्षा केंद्राचा पत्ता आणि इतर आवश्यक तपशील पाहता येणार आहेत.
उमेदवारांनी परीक्षा शहराची माहिती आणि प्रवेशपत्र उपलब्ध झाल्यानंतर ते अधिकृत पोर्टलवरून डाउनलोड करून त्यातील तपशील काळजीपूर्वक तपासावेत, असे आवाहन करण्यात आले आहे.
CTET ही केंद्रीय माध्यमिक शिक्षण मंडळातर्फे आयोजित करण्यात येणारी शिक्षक पात्रता परीक्षा असून, केंद्रीय तसेच संबंधित शाळांमधील शिक्षक भरतीसाठी या परीक्षेला महत्त्व आहे. त्यामुळे देशभरातील शिक्षकपदासाठी इच्छुक उमेदवारांचे या परीक्षेच्या वेळापत्रकाकडे लक्ष लागले आहे.
महत्वाच्या तारखा
CTET परीक्षा : १२ व १३ डिसेंबर २०२६
परीक्षा शहर व दिनांकाची माहिती : परीक्षेच्या १५ दिवस आधी
प्रवेशपत्र : परीक्षेच्या दोन दिवस आधी
