भारतीय रेल्वेमध्ये ५,१६५ पदांची मोठी भरती: १२वी आणि पदवीधरांसाठी सुवर्णसंधी
भारतीय रेल्वेमध्ये सरकारी नोकरीची स्वप्ने पाहणाऱ्या तरुण-तरुणींसाठी आनंदाची बातमी आहे. रेल्वे भरती बोर्डाने (RRB) नॉन-टेक्निकल पॉप्युलर कॅटेगरी अर्थात एनटीपीसी भरती २०२६ अंतर्गत एकूण ५ हजार १६५ रिक्त पदे भरण्यास अधिकृत मंजुरी दिली आहे.
Eduvarta
एज्युवार्ता न्यूज नेटवर्क
भारतीय रेल्वेमध्ये सरकारी नोकरीची स्वप्ने पाहणाऱ्या तरुण-तरुणींसाठी आनंदाची बातमी आहे. रेल्वे भरती बोर्डाने (RRB) नॉन-टेक्निकल पॉप्युलर कॅटेगरी अर्थात एनटीपीसी भरती २०२६ अंतर्गत एकूण ५ हजार १६५ रिक्त पदे भरण्यास अधिकृत मंजुरी दिली आहे. याबाबतची अधिसूचना नुकतीच प्रसिद्ध झाली असून, प्रत्यक्ष भरती प्रक्रिया २६ सप्टेंबरपासून सुरू होणार आहे. या भरतीमुळे हजारो युवकांना रेल्वेच्या विविध विभागांत स्थिर आणि सन्मानाची नोकरी मिळण्याची संधी उपलब्ध होणार आहे.
या एकूण पदांपैकी ३ हजार ४७७ पदे पदवीधर उमेदवारांसाठी राखीव ठेवण्यात आली आहेत, तर उर्वरित १ हजार ६८८ पदे बारावी उत्तीर्ण विद्यार्थ्यांसाठी आहेत. पदवीपूर्व स्तरावरील पदांमध्ये वाणिज्य-सह-तिकिट लिपिकांची ७००, कनिष्ठ लिपिक-सह-टंकलेखकांची ६००, लेखा लिपिक-सह-टंकलेखकांची २०० आणि रेल्वे लिपिकांची १८८ अशी विभागणी करण्यात आली आहे. यामुळे केवळ पदवीधरच नव्हे तर बारावी उत्तीर्ण तरुणांनाही रेल्वेमध्ये प्रवेशाची महत्त्वपूर्ण संधी मिळाली आहे.
पदवीधर स्तरावर सर्वाधिक मागणी मालगाडी व्यवस्थापकांच्या पदांना आहे. एकट्या या पदासाठी २ हजार ७५० जागा मंजूर करण्यात आल्या आहेत. त्याखालोखाल मुख्य वाणिज्यिक-सह-तिकीट पर्यवेक्षकांसाठी ५६, कनिष्ठ लेखा सहाय्यक-सह-टंकलेखकांसाठी ३०० आणि वरिष्ठ लिपिक-सह-टंकलेखकांसाठी ३७१ पदे उपलब्ध आहेत. ही पदे विविध झोन आणि विभागांमध्ये वितरित केली जाणार असल्याने संपूर्ण देशभरातील उमेदवारांना फायदा होईल.
रेल्वे भरती मंडळाने संपूर्ण प्रक्रिया वेळेवर आणि सुव्यवस्थित पार पाडण्यासाठी सविस्तर वेळापत्रक निश्चित केले आहे. नोडल आरआरबीला २६ सप्टेंबरपासून भरती प्रक्रिया राबविण्याची तसेच केंद्रीय रोजगार अधिसूचना जारी करण्याची जबाबदारी सोपविण्यात आली आहे. विविध स्तरांचा आढावा घेतल्यानंतर ही प्रक्रिया गतीने सुरू होईल, अशी अपेक्षा आहे. उमेदवारांनी अधिकृत वेबसाइटवर नियमित भेट देऊन अधिसूचना आणि अर्ज प्रक्रिया तपासून ठेवावी.
ही भरती भारतीय रेल्वेच्या विकासासाठी आणि युवकांच्या रोजगाराला चालना देण्यासाठी महत्त्वाची ठरेल. पात्र उमेदवारांनी तयारीला सुरुवात करावी आणि संधी साधण्यासाठी प्रयत्नशील राहावे. सरकारी नोकरीच्या क्षेत्रात ही एक मोठी संधी असल्याने लाखो तरुण-तरुणींना लाभ होण्याची शक्यता आहे.
