एम.ई.एस. इंग्लिश मीडियम स्कूलच्या सहा विद्यार्थ्यांची जिल्हास्तरीय बुद्धिबळ स्पर्धेसाठी निवड

एज्युवार्ता न्यूज नेटवर्क 

खंडाळा तालुकास्तरीय बुद्धिबळ क्रीडा स्पर्धेत उत्कृष्ट कामगिरी करत एम.ई.एस. इंग्लिश मीडियम स्कूल, शिरवळच्या सहा विद्यार्थ्यांनी जिल्हास्तरीय बुद्धिबळ स्पर्धेत धडक मारली आहे. विद्यार्थ्यांच्या या उल्लेखनीय यशामुळे शाळेच्या क्रीडा क्षेत्रात आनंदाचे वातावरण निर्माण झाले आहे.

तालुकास्तरीय स्पर्धेत विद्यार्थ्यांनी आपल्या एकाग्रता, संयम, बुद्धिमत्ता आणि उत्कृष्ट खेळकौशल्याच्या जोरावर प्रतिस्पर्ध्यांवर मात करत जिल्हास्तरीय स्पर्धेसाठी आपले स्थान निश्चित केले.

जिल्हास्तरीय स्पर्धेसाठी निवड झालेल्या विद्यार्थ्यांमध्ये १४ वर्षे वयोगटातील मुलांमध्ये आराध्य संकपाळ याचा समावेश आहे. १७ वर्षे वयोगटातील मुलींमध्ये आर्या नवले, अनन्या खुडे आणि विभावरी गुरव, तर १७ वर्षे वयोगटातील मुलांमध्ये सार्थक धुमाळ याची निवड झाली आहे. १९ वर्षे वयोगटातील मुलांमध्ये प्रज्वल राजेशिर्के याने जिल्हास्तरीय स्पर्धेसाठी पात्रता मिळवली.

या सहाही खेळाडूंनी तालुकास्तरीय स्पर्धेत दमदार कामगिरी करत शाळेचे नाव उज्ज्वल केले आहे. त्यांच्या या यशामुळे शाळेच्या क्रीडा क्षेत्रातील कामगिरीत आणखी एक मानाचा तुरा रोवला गेला आहे.

या यशाबद्दल संस्थेचे पदाधिकारी, शाला समितीचे पदाधिकारी, क्रीडावर्धिनीचे पदाधिकारी, शाळेच्या मुख्याध्यापिका, पर्यवेक्षिका, शिक्षक व शिक्षकेतर कर्मचारी तसेच पालकांनी सर्व यशस्वी खेळाडूंचे अभिनंदन केले. जिल्हास्तरीय स्पर्धेतही उत्कृष्ट कामगिरी करून यश संपादन करावे, यासाठी विद्यार्थ्यांना शुभेच्छा देण्यात आल्या.