अभियांत्रिकी अभ्यासक्रमाच्या संस्थात्मक फेरीसाठी ५० हजार जागा उपलब्ध; १४ सप्टेंबरपर्यंत प्रवेश सुरू
महाराष्ट्र अभियांत्रिकी प्रवेश प्रक्रिया २०२६ आता 'इन्स्टिट्यूशनल राउंड'मध्ये (संस्था-स्तरीय फेरी) प्रवेश करत असून, यात ५०,८४१ जागा उपलब्ध आहेत. रिक्त जागा, महत्त्वाच्या तारखा, शाखा आणि प्रवेशाशी संबंधित तपशील तपासा.
Eduvarta
एज्युवार्ता न्यूज नेटवर्क
राज्यातील अभियांत्रिकी अभ्यासक्रमाच्या केंद्रीभूत प्रवेश प्रक्रियेच्या नियमित चार फेऱ्या पूर्ण झाल्यानंतर आता संस्थात्मक फेरी सुरू झाली आहे. या फेरीसाठी एकूण ५० हजार ८४१ जागा उपलब्ध असून प्रवेश प्रक्रिया १४ सप्टेंबरपर्यंत चालू राहणार आहे. केंद्रीभूत प्रक्रियेत उपलब्ध असलेल्या २ लाख ३ हजार २९३ जागांपैकी चार फेऱ्यांमध्ये १ लाख ५२ हजार ४५२ विद्यार्थ्यांनी प्रवेश घेतला. त्यामुळे ६६ हजार ५२४ जागा रिक्त राहिल्या. यापैकी १५ हजार ६८३ जागा व्यवस्थापन कोट्यासाठी राखून ठेवण्यात आल्या असून उर्वरित जागा संस्थात्मक फेरीसाठी खुली करण्यात आल्या आहेत.
राज्यातील १७ विद्यापीठांच्या ३८० अभियांत्रिकी महाविद्यालयांमध्ये एकूण १११ अभ्यासक्रम उपलब्ध आहेत. यामध्ये एकूण २ लाख १८ हजार ९७६ जागा आहेत. केंद्रीभूत प्रवेश प्रक्रियेसाठी राज्य सामाईक प्रवेश परीक्षा कक्षाने जुलै महिन्यात नोंदणी प्रक्रिया राबविली होती. त्यावेळी २ लाख ४५ हजार ६४६ विद्यार्थ्यांनी नोंदणी केली होती. चार फेऱ्यांनंतर उपलब्ध झालेल्या संस्थात्मक फेरीच्या जागांमुळे अनेक विद्यार्थ्यांना प्रवेशाची संधी मिळणार आहे.
अभियांत्रिकी प्रवेशात संगणक अभियांत्रिकी शाखेला सर्वाधिक पसंती मिळाली. या शाखेत २३ हजार २३० विद्यार्थ्यांनी प्रवेश घेतला. त्यानंतर मेकॅनिकल इंजिनीअरिंगमध्ये १६ हजार ९१८, इलेक्ट्रॉनिक्स अँड टेलिकम्युनिकेशनमध्ये १५ हजार ९७१, कॉम्प्युटर सायन्स अँड इंजिनीअरिंगमध्ये १५ हजार ७८७, इन्फॉर्मेशन टेक्नॉलॉजीमध्ये १२ हजार ४९४, सिव्हील इंजिनीअरिंगमध्ये १२ हजार ९५ आणि इलेक्ट्रिकल इंजिनीअरिंगमध्ये १० हजार १९२ विद्यार्थ्यांनी प्रवेश घेतला. या आकड्यांवरून तंत्रज्ञान आणि संगणक संबंधित शाखांकडे विद्यार्थ्यांचा कल अधिक असल्याचे दिसून येते.
विद्यापीठनिहाय प्रवेशाबाबत पुण्यातील सावित्रीबाई फुले पुणे विद्यापीठाने आघाडी घेतली. येथे ५३ हजार ९७३ विद्यार्थ्यांनी प्रवेश घेतला. लोणेरे येथील डॉ. बाबासाहेब आंबेडकर तंत्रज्ञान विद्यापीठात ३० हजार ९०९, मुंबई विद्यापीठात २५ हजार ३५८, नागपूर येथील राष्ट्रसंत तुकडोजी महाराज विद्यापीठात १४ हजार २४ आणि कोल्हापूर येथील शिवाजी विद्यापीठात ८ हजार ४१६ विद्यार्थ्यांनी प्रवेश घेतला. संस्थात्मक फेरीमुळे उर्वरित जागांवर इच्छुक विद्यार्थ्यांना प्रवेश घेण्याची संधी उपलब्ध झाली आहे.
