CET कक्षाचा दणका: अभियांत्रिकी प्रवेशात सट्टाबाजारासारखी शुल्क आकारणी
अवाजवी शुल्क आकारणीला प्रतिबंध करण्यासाठी अधिकृत जाहीर सूचना प्रसिद्ध केली आहे. या सूचनेद्वारे सर्व संबंधित अभियांत्रिकी महाविद्यालयांना प्रवेश प्रक्रियेत निर्धारित नियमांचे पालन करण्याचे स्पष्ट निर्देश देण्यात आले आहेत.
Eduvarta
एज्युवार्ता न्यूज नेटवर्क
अभियांत्रिकी अभ्यासक्रमाच्या संस्था स्तरावरील प्रवेशासाठी विद्यार्थ्यांकडून अवाजवी तसेच नियमबाह्य शुल्क आकारले जात असल्याच्या तक्रारीची महाराष्ट्र राज्य सामाईक प्रवेश परीक्षा (CET) कक्षाने गंभीर दखल घेतली आहे. या प्रकाराला आळा घालण्यासाठी CET कक्षाने सर्व संबंधित अभियांत्रिकी महाविद्यालयांना नियमांचे काटेकोरपणे पालन करण्याचे आणि विद्यार्थ्यांकडून कोणतेही अतिरिक्त शुल्क न आकारण्याचे कडक निर्देश दिले आहेत.
यासंदर्भात अभियांत्रिकी प्रवेश प्रक्रियेत काही महाविद्यालयांकडून शाखांच्या मागणीनुसार ‘सट्टाबाजारासारखी’ अवाजवी शुल्क आकारणी तसेच रोख रकमेची मागणी केली जात असल्याचा आरोप करणारे निवेदन ९ सप्टेंबर रोजी CET कक्षाकडे प्राप्त झाले. या निवेदनात अशा महाविद्यालयांची प्रवेश प्रक्रिया रद्द करावी तसेच नियमबाह्य पद्धतीने निश्चित होणाऱ्या प्रवेशांना मंजुरी देऊ नये, अशी मागणी करण्यात आली होती.
तक्रारीची दखल घेत CET कक्षाने तातडीने कार्यवाही केली असून, अवाजवी शुल्क आकारणीला प्रतिबंध करण्यासाठी अधिकृत जाहीर सूचना प्रसिद्ध केली आहे. या सूचनेद्वारे सर्व संबंधित अभियांत्रिकी महाविद्यालयांना प्रवेश प्रक्रियेत निर्धारित नियमांचे पालन करण्याचे स्पष्ट निर्देश देण्यात आले आहेत.
संस्था स्तरावरील प्रवेशाच्या वेळी विद्यार्थ्यांकडून अतिरिक्त किंवा नियमबाह्य शुल्क आकारले जाऊ नये, यासाठी CET कक्षाने महाविद्यालयांना खबरदारी घेण्याचे निर्देश दिले आहेत. त्यामुळे प्रवेशाच्या नावाखाली विद्यार्थ्यांकडून अतिरिक्त आर्थिक भार टाकणाऱ्या संस्थांवर आता प्रशासनाची नजर राहणार आहे.
दरम्यान, प्रवेश प्रक्रियेत अवाजवी शुल्काची आकारणी किंवा रोख रकमेची मागणी होत असल्यास संबंधित विद्यार्थ्यांनी आणि पालकांनी त्याबाबत तक्रार नोंदवावी, असे आवाहन करण्यात आले आहे. CET कक्षाच्या या भूमिकेमुळे अभियांत्रिकी प्रवेश प्रक्रियेत पारदर्शकता राखण्यास मदत होण्याची अपेक्षा व्यक्त होत आहे.युवासेनेचे सह सचिव कल्पेश यादव यांनी सीईटी सेलकडे याबाबतचे निवेदन दिले होते.त्यावर सीईटी-सेलने पत्र काढले आहे.
