MPSC : गट- क सेवा संयुक्त पूर्व परीक्षा पुढे ढकलली; आता 'या' तारखेला होणार परीक्षा
MPSC गट-क संयुक्त पूर्व परीक्षा २०२६ ची तारीख बदलून ती ३ जानेवारी २०२७ करण्यात आली आहे. उमेदवारांनी परीक्षेच्या नवीन तारखेनुसार आपल्या अभ्यासाचे नियोजन अद्ययावत करावे.
Eduvarta
एज्युवार्ता न्यूज नेटवर्क
महाराष्ट्र लोकसेवा आयोगाने (MPSC) महाराष्ट्र गट-क सेवा संयुक्त पूर्व परीक्षा २०२६ संदर्भात महत्त्वाची घोषणा केली आहे. विविध शासकीय विभागांमधील गट-क संवर्गातील पदांसाठी आयोगामार्फत घेण्यात येणारी ही परीक्षा यापूर्वी २५ ऑक्टोबर २०२६ रोजी ऑफलाइन OMR पद्धतीने घेण्यात येणार असल्याचे जाहीर करण्यात आले होते. मात्र, विविध प्रशासकीय बाबींचा विचार करून या परीक्षेच्या आयोजनाच्या तारखेत बदल करण्यात आला आहे. आयोगाने ९ सप्टेंबर २०२६ रोजी प्रसिद्ध केलेल्या शुद्धीपत्रकाद्वारे परीक्षेची नवीन तारीख जाहीर केली आहे.
आयोगाच्या शुद्धीपत्रकानुसार, राज्यातील विविध जिल्ह्यांमध्ये परीक्षा उपकेंद्रांची उपलब्धता, स्थानिक परिस्थिती, वाहतूक व्यवस्था तसेच उमेदवारांना परीक्षा केंद्रांवर वेळेत आणि सुरक्षितपणे पोहोचता यावे, यासह परीक्षा सुरळीत, शांततापूर्ण आणि नियोजनबद्ध पद्धतीने पार पाडण्यासाठी आवश्यक प्रशासकीय बाबींचा विचार करण्यात आला. याशिवाय काही जिल्ह्यांकडून प्राप्त झालेले अहवाल, राज्य सेवा मुख्य परीक्षा २०२६, सणासुदीचा कालावधी, इतर भरती संस्थांच्या परीक्षांचे वेळापत्रक आणि हिवाळी अधिवेशन यांसारख्या बाबींचाही आयोगाने विचार केला आहे.
या सर्व बाबींचा विचार केल्यानंतर महाराष्ट्र गट-क सेवा संयुक्त पूर्व परीक्षा २०२६ आता रविवार, ३ जानेवारी २०२७ रोजी राज्यातील सर्व जिल्हा केंद्रांवर आयोजित करण्यात येणार आहे. त्यामुळे यापूर्वी २५ ऑक्टोबर २०२६ ही परीक्षा तारीख लक्षात ठेवून तयारी करणाऱ्या उमेदवारांना आता सुधारित वेळापत्रकानुसार नियोजन करावे लागणार आहे. परीक्षा पुढे ढकलण्यात आल्याने उमेदवारांना अभ्यासासाठी अतिरिक्त कालावधी मिळणार असून, या कालावधीचा प्रभावी वापर करून अभ्यासक्रमाची पुनरावृत्ती, सराव चाचण्या आणि मागील प्रश्नपत्रिकांचा सराव करण्याची संधी मिळणार आहे.
दरम्यान, परीक्षा केंद्र, प्रवेशपत्र, परीक्षेची वेळ, केंद्रनिहाय सूचना आणि अन्य आवश्यक माहिती आयोगाच्या अधिकृत संकेतस्थळावर यथावकाश प्रसिद्ध करण्यात येणार असल्याचे शुद्धीपत्रकात स्पष्ट करण्यात आले आहे. उमेदवारांनी आयोगाच्या अधिकृत संकेतस्थळावरील सूचना नियमितपणे तपासाव्यात, असे आवाहन करण्यात आले आहे.
