बोर्ड परीक्षेपूर्वीच CBSE च्या शाळांना कडक सूचना; सखोल आणि अचूक तपासणी करा
२०२७ च्या बोर्ड परीक्षांपूर्वी विद्यार्थ्यांची अचूक माहिती आणि 'एलओसी' सादर करण्याबाबत सीबीएसईने शाळांना कडक सूचना दिल्या आहेत. परीक्षेस बसण्यापासून रोखू शकणाऱ्या त्रुटी टाळा.
Eduvarta
एज्युवार्ता न्यूज नेटवर्क
केंद्रीय माध्यमिक शिक्षण मंडळाने (सीबीएसई) २०२७ च्या बोर्ड परीक्षेच्या तयारीला औपचारिक सुरुवात केली असून देशभरातील सर्व संलग्न शाळांना एक महत्त्वपूर्ण आणि कडक सूचना जारी केली आहे. मंडळाने स्पष्ट केले आहे की विद्यार्थ्यांनी निवडलेले विषय तसेच त्यांची वैयक्तिक माहिती सादर करण्यापूर्वी शाळांनी त्याची सखोल आणि अचूक तपासणी करणे अत्यावश्यक आहे. विद्यार्थ्याचे नाव, जन्मतारीख, पालकांचे नाव, विषयाचे नाव किंवा सब्जेक्ट कोडमध्ये होणारी छोटीशी चूकही पुढील परीक्षेच्या प्रक्रियेत मोठी अडचण निर्माण करू शकते आणि काही प्रकरणांत विद्यार्थ्याचा प्रवेशच रोखला जाऊ शकतो, असा इशारा सीबीएसईने दिला आहे.
मंडळाने शाळांच्या प्राचार्यांना आणि प्रमुखांना पाठवलेल्या पत्रात नमूद केले आहे की वारंवार सूचना देऊनही विद्यार्थ्यांच्या माहितीमध्ये चुका आढळत राहतात. काही शाळा निर्धारित मुदतीत डेटा सादर करत नाहीत, तर काही चुकीची माहिती भरतात. यामुळे चुकीचा डेटा सुधारण्यासाठी शाळांकडून अर्ज येतात, ज्यामुळे बोर्डाचा अतिरिक्त वेळ खर्च होतो आणि परीक्षेच्या नियोजनात अनावश्यक विलंब होतो. त्यामुळे सीबीएसईने सर्व शाळांना ‘लिस्ट ऑफ कॅन्डिडेट्स’ (एलओसी) आणि आवश्यक तपशील निश्चित मुदतीतच जमा करण्याचे स्पष्ट निर्देश दिले आहेत.
सीबीएसई अधिकाऱ्यांच्या माहितीनुसार, २०२७ च्या परीक्षेसंबंधी महत्त्वाच्या प्रक्रिया लवकरच सुरू होणार आहेत. इयत्ता नववी आणि अकरावीसाठी विद्यार्थ्यांची ऑनलाइन नोंदणी तर दहावी आणि बारावीसाठी परीक्षार्थींची अंतिम यादी (एलओसी) सादर करण्याची प्रक्रिया राबवली जाईल. या पार्श्वभूमीवर शाळांनी आधीपासूनच प्रत्येक विद्यार्थ्याचा अचूक डेटा तयार ठेवावा, असे आवाहन बोर्डाने केले आहे. यामुळे नंतरच्या टप्प्यातील अडचणी टाळता येतील आणि संपूर्ण प्रक्रिया सुरळीत होईल.
शाळांनी विशेषतः विद्यार्थ्याचे संपूर्ण नाव आणि त्याचे अचूक स्पेलिंग, जन्मतारीख, लिंग व प्रवर्ग, आई-वडिलांचे किंवा पालकांचे नाव, निवडलेले विषय व योग्य सब्जेक्ट कोड तसेच नमुन्यानुसार फोटो आणि स्वाक्षरी या गोष्टींची आधीच काळजीपूर्वक तपासणी करावी, असे सीबीएसईने सांगितले आहे. या सूचनांचे पालन केल्यास विद्यार्थ्यांना भविष्यात कोणत्याही अडचणींचा सामना करावा लागणार नाही आणि बोर्ड परीक्षा प्रक्रिया अधिक कार्यक्षम होईल.
