पुणे जिल्ह्यात ३० ठिकाणी रोजगार मेळावे; २९ सप्टेंबरला एकाच दिवशी रोजगार मेळावे व प्लेसमेंट ड्राइव्ह
पुणे जिल्ह्यातील रोजगार मेळाव्यांमध्ये विविध उद्योग, कंपन्या आणि आस्थापनांचा सहभाग राहणार आहे. संबंधित आस्थापनांकडून विविध शैक्षणिक पात्रता, कौशल्ये आणि रोजगाराच्या स्वरूपानुसार रिक्त पदांसाठी उमेदवारांची निवड करण्यात येणार आहे. त्यामुळे युवक-युवतींना त्यांच्या शैक्षणिक पात्रतेनुसार आणि कौशल्यानुसार रोजगाराच्या संधी उपलब्ध होण्याची अपेक्षा आहे.
Eduvarta
एज्युवार्ता न्यूज नेटवर्क
युवकांना रोजगार, स्वयंरोजगार, कौशल्य विकास आणि उद्योजकतेच्या विविध संधी उपलब्ध करून देण्याच्या उद्देशाने कौशल्य, रोजगार, उद्योजकता व नाविन्यता विभागामार्फत ‘रोजगार महाकुंभ महाराष्ट्र-२०२६’ हा उपक्रम राबविण्यात येत आहे. या उपक्रमांतर्गत २९ सप्टेंबर २०२६ रोजी राज्यभरात एकाच दिवशी ५०० हून अधिक रोजगार मेळावे व प्लेसमेंट ड्राइव्ह आयोजित करण्यात येणार आहेत.
पुणे जिल्ह्यात जिल्हा कौशल्य विकास, रोजगार व उद्योजकता मार्गदर्शन केंद्राच्या वतीने विविध तालुक्यांतील ३० शैक्षणिक संस्थांमध्ये रोजगार मेळाव्यांचे आयोजन करण्यात आले आहे.
या उपक्रमातून युवकांना त्यांच्या जिल्ह्यात किंवा परिसरातच रोजगाराच्या संधी उपलब्ध करून देण्यावर भर देण्यात आला आहे. त्याचबरोबर उद्योग व विविध आस्थापनांना आवश्यक मनुष्यबळ उपलब्ध करून देणे तसेच शासन, उद्योग-आस्थापना आणि रोजगार इच्छुक युवक-युवती यांना एकाच व्यासपीठावर आणणे, हा उपक्रमाचा प्रमुख उद्देश आहे.
पुणे जिल्ह्यातील रोजगार मेळाव्यांमध्ये विविध उद्योग, कंपन्या आणि आस्थापनांचा सहभाग राहणार आहे. संबंधित आस्थापनांकडून विविध शैक्षणिक पात्रता, कौशल्ये आणि रोजगाराच्या स्वरूपानुसार रिक्त पदांसाठी उमेदवारांची निवड करण्यात येणार आहे. त्यामुळे युवक-युवतींना त्यांच्या शैक्षणिक पात्रतेनुसार आणि कौशल्यानुसार रोजगाराच्या संधी उपलब्ध होण्याची अपेक्षा आहे.
रोजगाराच्या शोधात असलेल्या पुणे जिल्ह्यातील युवक-युवतींनी या मेळाव्यांमध्ये सहभागी होऊन उपलब्ध संधींचा लाभ घ्यावा, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्राच्या वतीने करण्यात आले आहे.
राज्यातील युवकांना रोजगारक्षम बनविण्यासोबतच उद्योगांच्या मनुष्यबळाच्या गरजा पूर्ण करण्यासाठी कौशल्य विकास, रोजगार, उद्योजकता व नाविन्यता विभागामार्फत विविध उपक्रम राबविण्यात येत आहेत. ‘रोजगार महाकुंभ महाराष्ट्र-२०२६’ हा त्याचाच एक भाग असून, युवक आणि उद्योग यांच्यातील दुवा अधिक प्रभावी करण्याचा प्रयत्न या माध्यमातून करण्यात येत आहे.
अधिक माहितीसाठी जिल्हा कौशल्य विकास, रोजगार व उद्योजकता मार्गदर्शन केंद्र, ४८१, रास्ता पेठ, पुणे-११ येथे संपर्क साधावा. दूरध्वनी क्रमांक ०२०-२६१३३६०६ असून रोजगारविषयक माहितीसाठी www.rojgar.mahaswayam.gov.in या संकेतस्थळाला भेट द्यावी.
