शासकीय वसतिगृहे व निवासी शाळांतील विद्यार्थ्यांना फ्लेवर्ड मिल्क; कडक अंमलबजावणीचे आदेश
महाराष्ट्र सरकार १५ सप्टेंबरपासून वसतिगृहातील विद्यार्थ्यांसाठी २०० मिलीचे फ्लेवर्ड मिल्क (सुगंधी दूध) पॅक्स उपलब्ध करून देत आहे. यात लाभार्थी, किंमत, पुरवठादार आणि महत्त्वाचे मुद्दे यांची माहिती दिली आहे.
Eduvarta
एज्युवार्ता न्यूज नेटवर्क
महाराष्ट्र शासनाच्या सामाजिक न्याय व विशेष सहाय्य विभागाने शासकीय वसतिगृहे आणि निवासी शाळांमधील विद्यार्थ्यांसाठी दूधपुरवठ्यात महत्त्वपूर्ण बदल केला आहे. पोषण आहाराचा भाग म्हणून आता विद्यार्थ्यांना २०० मिली टेट्रा पॅकमधील फ्लेवर्ड मिल्क दिले जाणार आहे. ३१ ऑगस्ट रोजी प्रसिद्ध झालेल्या शासन निर्णयानुसार हा पुरवठा १५ सप्टेंबरपासून सुरू होईल. राज्यातील ४४९ शासकीय वसतिगृहांमधील ४६ हजार ६६३ विद्यार्थी आणि ९२ निवासी शाळांमधील १८ हजार ६०० विद्यार्थी अशा एकूण ६५ हजारांहून अधिक विद्यार्थ्यांना या योजनेचा लाभ मिळणार आहे.
राज्यस्तरीय प्रशासकीय खरेदी समितीने प्रति २०० मिली फ्लेवर्ड मिल्क टेट्रा पॅकचा दर २६.४० रुपये निश्चित केला आहे. ई-निविदा प्रक्रियेद्वारे हा निर्णय झाला. मुंबई, नाशिक, पुणे आणि लातूर विभागांसाठी पराग मिल्क फूड्स तर नागपूर, अमरावती आणि छत्रपती संभाजीनगर विभागांसाठी श्री वारणा संघ पुरवठा करणार आहे. हे दर पुढील तीन वर्षांसाठी लागू राहणार असून या काळात दरवाढ होणार नाही. गुणवत्तेत किंवा सेवेत त्रुटी आढळल्यास संबंधित आदेश रद्द केले जातील. स्थानिक तात्पुरती दूध व्यवस्था १४ सप्टेंबर रोजी संपेल आणि त्यानंतर नियमित फ्लेवर्ड मिल्क पुरवठा सुरू होईल, अशा सूचना समाजकल्याण आयुक्तांना देण्यात आल्या आहेत.
वसतिगृहांमध्ये भोजनाची गुणवत्ता, स्वच्छता, पिण्याचे पाणी, आरोग्य सुविधा, सुरक्षा आणि इतर मूलभूत गरजांबाबत अनेक समस्या आजही आहेत. अशा वेळी फ्लेवर्ड मिल्कसाठी मोठा निधी उपलब्ध होणे आणि इतर प्रश्नांकडे दुर्लक्ष होणे चिंताजनक आहे, असे आंबेकर यांनी सांगितले. त्यांनी विद्यार्थ्यांची संख्या, एकूण खर्च, निविदेतील कंपन्या, अटी, गुणवत्ता अहवाल आणि करार याबाबतची सर्व माहिती सार्वजनिक करण्याची मागणी केली आहे.
या निर्णयाबाबत मात्र काही प्रश्न उपस्थित होत आहेत. स्थानिक दूधपुरवठ्यात अनियमितता होती का, गुणवत्ता निकष पूर्ण होत नव्हते का किंवा पुरवठ्यात अडचणी होत्या का, याचे शासनाने मूल्यांकन केले का, याबाबत शंका व्यक्त केली. आहारतज्ज्ञांचा सल्ला घेण्यात आला का आणि दररोज फ्लेवर्ड मिल्कच का आवश्यक आहे, असेही त्यांनी विचारले. विद्यार्थ्यांना महागडा पॅकबंद आहार नको तर पौष्टिक आणि साधा आहार हवा.
कुलदीप आंबेकर, (अध्यक्ष) स्टुडंट हेल्पिंग हँड
