स्पुक्टोचा सुवर्णमहोत्सव व ‘सुवर्णसंचित’ प्रकाशन सोहळा रविवारी

एज्युवार्ता न्यूज नेटवर्क 

सावित्रीबाई फुले पुणे विद्यापीठीय व महाविद्यालयीन अध्यापक संघटनेच्या (स्पुक्टो) सुवर्णमहोत्सवी वर्षानिमित्त सुवर्णमहोत्सव समारंभ, कृतज्ञता सोहळा तसेच ‘सुवर्णसंचित’ या स्मरणिकेचा प्रकाशन समारंभ येत्या रविवारी  दि. २० सप्टेंबर रोजी सकाळी १०.३० वाजता अहिल्यानगर येथील न्यू आर्टस, कॉमर्स अँड सायन्स महाविद्यालयाच्या राजर्षी छत्रपती शाहू महाराज सभागृहात आयोजित करण्यात आला आहे,असे स्पुक्टोचे सरचिटणीस प्रा. डॉ. प्रवीण ताटे-देशमुख यांनी सांगितले. 

सन १९७४ पासून स्पुक्टो ही विद्यापीठीय व महाविद्यालयीन शिक्षकांच्या शैक्षणिक, सामाजिक व व्यावसायिक हितासाठी तसेच उच्च शिक्षणाच्या गुणवत्तावर्धनासाठी कार्यरत आहे. संघटनेच्या पन्नास वर्षांच्या वाटचालीत विचार, संघटन, संघर्ष, संवाद आणि शिक्षकांच्या न्याय्य हक्कांसाठी केलेल्या सातत्यपूर्ण प्रयत्नांचा समावेश आहे. या दीर्घ प्रवासात योगदान देणाऱ्या ज्येष्ठ पदाधिकारी, कार्यकर्ते व सहकाऱ्यांच्या कार्याचे स्मरण आणि त्यांच्या योगदानाप्रती कृतज्ञता व्यक्त करण्याच्या उद्देशाने हा सोहळा आयोजित करण्यात आला आहे.

यावेळी संघटनेच्या गेल्या पन्नास वर्षांच्या वाटचालीचा आढावा घेणाऱ्या ‘सुवर्णसंचित’ या स्मरणिकेचे प्रकाशन करण्यात येणार आहे.कार्यक्रमास राज्याच्या उच्च शिक्षण विभागाचे संचालक डॉ. शैलेंद्र देवळाणकर प्रमुख पाहुणे म्हणून उपस्थित राहणार आहेत. महाराष्ट्र राज्य प्राध्यापक महासंघाचे अध्यक्ष प्रा. डॉ. प्रवीण रघुवंशी आणि ज्येष्ठ नेते प्रा. डॉ. सी. आर. सदासिवन हे प्रमुख वक्ते म्हणून मार्गदर्शन करणार आहेत. अखिल भारतीय प्राध्यापक संघटनेचे माजी महासचिव प्रो. डॉ. अशोक बर्मन कार्यक्रमाच्या अध्यक्षस्थानी असणार आहेत.

यावेळी ‘सुवर्णसंचित’चे संपादक डॉ. एस. पी. लवांडे, संयोजन समितीचे अध्यक्ष प्रा. डॉ. के. एल. गिरमकर, स्पुक्टोचे अध्यक्ष प्रा. प्रकाश वाळुंज यांची प्रमुख उपस्थिती राहणार आहे.स्पुक्टोच्या पन्नास वर्षांच्या कार्याचा आढावा, ज्येष्ठ कार्यकर्त्यांचा सन्मान आणि भविष्यातील वाटचालीसाठी नव्या संकल्पाची दिशा या कार्यक्रमातून अधोरेखित होणार आहे.