‘गोपालकाला’ उत्सवातून चिमुकल्यांना आरोग्यदायी आहाराचे धडे
दही हाडे व दात मजबूत करण्यासाठी उपयुक्त आहे, पोहे शरीराला ऊर्जा देतात, तर शेंगदाणे प्रथिने व ताकद देतात, याबाबत मुलांना सोप्या पद्धतीने मार्गदर्शन करण्यात आले.
Eduvarta
एज्युवार्ता न्यूज नेटवर्क
एम.ई.एस. इंग्लिश मीडियम स्कूल, शिरवळच्या पूर्व प्राथमिक विभागात श्रीकृष्ण जन्माष्टमीनिमित्त ‘गोपालकाला’ उत्सव मोठ्या उत्साहात आणि आनंदात साजरा करण्यात आला. यंदाच्या उपक्रमाची संकल्पना ‘Celebration brings values, and values bring good health!’ अशी होती. या उत्सवानिमित्त चिमुकल्या विद्यार्थ्यांनी उत्साहाने दहीहंडी उपक्रमात सहभाग घेतला आणि पारंपरिक पद्धतीने सणाचा आनंद लुटला.
उत्सवाच्या माध्यमातून विद्यार्थ्यांना गोपालकालामध्ये वापरल्या जाणाऱ्या विविध पौष्टिक पदार्थांची माहिती देण्यात आली. दही हाडे व दात मजबूत करण्यासाठी उपयुक्त आहे, पोहे शरीराला ऊर्जा देतात, तर शेंगदाणे प्रथिने व ताकद देतात, याबाबत मुलांना सोप्या पद्धतीने मार्गदर्शन करण्यात आले. तसेच भाजलेले हरभरे प्रथिने व तंतुमय घटकांचा चांगला स्रोत असून, कुरमुरे शरीराला ऊर्जा देतात, हेही विद्यार्थ्यांना समजावून सांगण्यात आले.
पारंपरिक सणाच्या आनंदासोबतच पौष्टिक आहार, आरोग्यदायी खाण्याच्या सवयी आणि निरोगी जीवनशैलीचे महत्त्व विद्यार्थ्यांच्या मनावर बिंबविण्यात आले. खेळकर आणि आनंददायी वातावरणात झालेल्या या उपक्रमामुळे विद्यार्थ्यांना परंपरा आणि आरोग्य यांची सुंदर सांगड घालून शिकण्याची संधी मिळाली. ‘निरोगी आहार, निरोगी बालक!’ या संदेशाने गोपालकाला उत्सवाची सांगता झाली.
