सुप्रसिद्ध शिक्षण संस्थाचालकाची स्वतःवर गोळ्या झाडून आत्महत्या; मृत्यूपूर्वी लिहून ठेवली दोन शब्दांची नोट
लातूरचे ख्यातनाम शिक्षणतज्ज्ञ संजीव सोनवणे यांचे निधन झाले आहे. पोलीस या प्रकरणातील परिस्थितीचा तपास करत आहेत, तर शिक्षण क्षेत्रात त्यांच्या निधनाबद्दल शोक व्यक्त केला जात आहे.
Eduvarta
एज्युवार्ता न्यूज नेटवर्क
लातूर शहरात शैक्षणिक क्षेत्रात मोठे योगदान दिलेल्या आणि ‘लातूर पॅटर्न’ला आकार देणाऱ्या प्रसिद्ध शिक्षणसंस्था चालक संजीव सोनवणे यांनी स्वतःचे जीवन संपवले. गेल्या काही महिन्यांपूर्वी नीट परीक्षेतील पेपरफुटीमुळे चर्चेत आलेल्या या शहरात पुन्हा एकदा खळबळ माजली आहे. सोनवणे यांनी राहत्या घरी स्वतःवर गोळी झाडून आत्महत्येचा प्रयत्न केला. मृत्यूपूर्वी त्यांनी दोन शब्दांची चिठ्ठी लिहून ठेवली होती. मात्र या घटनेचे अद्याप नेमके कारण अद्याप स्पष्ट झालेले नाही. पोलिसांकडून तपास सुरू असून अधिकृत चौकशीअंतीच सत्य समोर येईल.
संजीव सोनवणे यांच्या कुटुंबात एक मुलगा आणि एक मुलगी आहे. दोघेही इंजिनिअर असून सध्या परदेशात नोकरी करतात. घटनेच्या वेळी त्यांच्या पत्नी मुलीकडे गेल्या होत्या, त्यामुळे सोनवणे घरी एकटेच होते. बातमी समोर येताच कुटुंबीय, मित्रपरिवार तसेच शैक्षणिक आणि सामाजिक क्षेत्रातून हळहळ व्यक्त होत आहे. आत्महत्येसारखे टोकाचे पाऊल कोणत्या कारणाने उचलले गेले, याबाबत अद्याप अधिक माहिती उपलब्ध नाही.
शैक्षणिक क्षेत्रात सोनवणे यांचा प्रवास लक्षणीय आहे. त्यांचे वडील चंद्रभानू सोनवणे छत्रपती संभाजीनगरच्या विद्यापीठात हिंदी साहित्याचे प्रमुख होते. संजीव यांनी बेंगळुरूतील सिद्धगंगा कॉलेज, तुमकूर येथे इलेक्ट्रॉनिक्स अँड टेलिकम्युनिकेशन इंजिनिअरिंगचे शिक्षण घेतले. सुरुवातीला बीडच्या परळीत कोचिंग क्लासेस सुरू केले. तीन वर्षांनंतर २००० मध्ये लातूरमध्ये संकल्प कोचिंग क्लासेस सुरू केले. २००५ मध्ये चंद्रभानू सोनवणे कॉलेजची स्थापना केली. बार्शीतील उकडगाव येथे शाळा व महाविद्यालय तर तीन वर्षांपूर्वी पुण्यातील खडकवासला येथे शाळा आणि महाविद्यालय स्थापन केले.
या घटनेने लातूरच्या शैक्षणिक वर्तुळात शोककळा पसरली आहे. सोनवणे यांनी अनेक विद्यार्थ्यांना यशस्वी होण्यास मदत केली होती. पोलिसांनी चिठ्ठी आणि इतर पुराव्यांच्या आधारे चौकशी सुरू ठेवली आहे. कुटुंबीयांना धीर देण्यासाठी सर्वंकष सहकार्य अपेक्षित आहे. या दुःखद घटनेमुळे शैक्षणिक क्षेत्रातील एक मोठा चेहरा हरपला आहे.
