सुरांच्या माध्यमातून गुरूंना मानवंदना; शिक्षक दिनानिमित्त विशेष संगीत कार्यक्रम

एज्युवार्ता न्यूज नेटवर्क 

महाराष्ट्र एज्युकेशन सोसायटीतर्फे शिक्षक दिनाचे औचित्य साधून Violin Academy तर्फे CPPM – Centre for Promotion and Popularisation of Music यांच्या अंतर्गत विद्यार्थ्यांसाठी विशेष संगीत कार्यक्रमाचे आयोजन करण्यात आले. विद्यार्थ्यांना संगीत क्षेत्रातील नामवंत कलाकारांचे मार्गदर्शन मिळावे तसेच भारतीय शास्त्रीय संगीताची आवड आणि जिज्ञासा निर्माण व्हावी, हा या कार्यक्रमाचा प्रमुख उद्देश होता.

या कार्यक्रमासाठी प्रसिद्ध व्हायोलिन वादक श्री. तेजसजी उपाध्ये उपस्थित होते. आपल्या सुरेल व्हायोलिन वादनाने त्यांनी विद्यार्थ्यांना मंत्रमुग्ध केले. त्यांना श्री. अनुराग अलूरकर यांनी तबल्यावर, तर श्री. अखिलेश चरडे यांनी सिंथेसायझरवर प्रभावी साथसंगत केली.

कार्यक्रमाची सुरुवात CPPMच्या विद्यार्थ्यांनी शाळेतील शिक्षकांना समर्पित केलेल्या भावपूर्ण गीताने झाली. त्यानंतर श्री. तेजसजी उपाध्ये यांनी व्हायोलिन वादनाचे विविध पैलू विद्यार्थ्यांना समजावून सांगितले. अभ्यासक्रमातील विविध रागांवर आधारित गीते त्यांनी व्हायोलिनवर सादर केली. त्यांच्या सादरीकरणाला विद्यार्थ्यांनी उत्स्फूर्त प्रतिसाद दिला.

कार्यक्रमादरम्यान विद्यार्थ्यांनी संगीत व व्हायोलिन वादनासंदर्भात विविध प्रश्न विचारले. श्री. उपाध्ये यांनी विद्यार्थ्यांच्या प्रश्नांना समर्पक उत्तरे देत संगीत शिकण्याची प्रक्रिया, नियमित सराव आणि भारतीय शास्त्रीय संगीताच्या अभ्यासाबाबत मौलिक मार्गदर्शन केले.

या सुरेल आणि ज्ञानवर्धक कार्यक्रमाची सांगता आभार प्रदर्शनाने झाली. कार्यक्रमाच्या यशस्वी आयोजनासाठी शाळेच्या प्राचार्या सौ. अदिती कुलकर्णी, उपप्राचार्या सौ. भाग्यश्री ढमाले आणि पर्यवेक्षिका सौ. दिपाली थोरात यांचे मार्गदर्शन व सहकार्य लाभले. संगीताच्या मधुर सुरांनी शिक्षक दिनाचा आनंद द्विगुणित करत हा कार्यक्रम विद्यार्थ्यांसाठी ज्ञानवर्धक, प्रेरणादायी आणि संस्मरणीय ठरला.