PCM ग्रुपमध्ये या विद्यार्थ्यांना १०० पर्सेंटाइल; प्रवेशाचे वेळापत्रक लवकरच

 एज्युवार्ता न्यूज नेटवर्क 

 महाराष्ट्र राज्य सामाईक प्रवेश परीक्षा कक्षातर्फे शैक्षणिक वर्ष 2026-27 साठी एप्रिल 2026 मध्ये घेण्यात आलेल्या अभियांत्रिकी, औषधनिर्माणशास्त्र आणि कृषी शिक्षण या व्यावसायिक अभ्यासक्रमांच्या प्रवेशासाठीच्या एमएचटी-सीईटी (PCM) गटाच्या पहिल्या संधीच्या परीक्षेचा निकाल जाहीर करण्यात आला आहे. या परीक्षेत एकूण 26 विद्यार्थ्यांनी 100 पर्सेंटाईल गुण मिळवून यश संपादन केले आहे.

सीईटीच्या निकालानंतर आता अभियांत्रिकी, फार्मसी आणि कृषी शिक्षण अभ्यासक्रमांच्या प्रवेश प्रक्रियेकडे विद्यार्थ्यांचे लक्ष लागले असून, लवकरच सामाईक प्रवेश प्रक्रियेचे वेळापत्रक जाहीर होण्याची अपेक्षा आहे.

पीसीएम गटाच्या पहिल्या संधीच्या सीईटी परीक्षेत 100 पर्सेंटाईल मिळविणाऱ्या महाराष्ट्रातील विद्यार्थ्यांमध्ये आर्यन शैलेंद्र कुंजीर (पुणे), आदर्श राज (मुंबई उपनगर), आर्यन अजित शर्मा (नागपूर), चैतन्य गणेश येरणे (चंद्रपूर), आशुतोषकुमार संजय चौबे (मुंबई), दर्शन गणेश चौधरी (चंद्रपूर), दर्शील राजन कुंटे (ठाणे), ईश्वरी सुरेश गागरे (अहिल्यानगर), इबादूर रहमान कामरुल बारलस्कर (पुणे), अनंत अशोक जाधव (धाराशिव), जान्हवी अस्ती (गोंदिया), जान्हवी मिश्रा (चंद्रपूर), कनिष्क देवेंद्र वाघ (नागपूर), सार्थक खानापुरे (सोलापूर), ध्रुव धर्मराज खोसे (लातूर), ऐश्वर्य अतुल लाडे (नागपूर), नमिष कौशिक (पुणे), नमया धीरज अग्रवाल (गोंदिया), राजदीप विठ्ठल ठाकरे (यवतमाळ), रेयान कुमार (मुंबई), ऋतुराज राजेश राजे (गोंदिया), शौर्य फुलबांधे (नागपूर), शौर्य पंकज सिंग (ठाणे) आणि वेद रुपेश तळेले (ठाणे) यांचा समावेश आहे.

100 पर्सेंटाईल मिळविणाऱ्या विद्यार्थ्यांमध्ये 22 विद्यार्थी आणि 4 विद्यार्थिनींचा समावेश असून, त्यापैकी 24 विद्यार्थी महाराष्ट्रातील तर 2 विद्यार्थी इतर राज्यांतील आहेत. विद्यार्थ्यांना त्यांचा निकाल त्यांच्या लॉगिनमधून उपलब्ध करून देण्यात आला असून, संबंधित अभ्यासक्रमांच्या सामाईक प्रवेश प्रक्रियेला (CAP) लवकरच सुरुवात होणार असल्याची माहिती सीईटी कक्षाने दिली.

 पीसीएम गटाची सीईटी परीक्षा 11 ते 20 एप्रिल 2026 या कालावधीत 8 दिवसांत 16 सत्रांमध्ये संगणकाधारित (CBT) पद्धतीने घेण्यात आली. परीक्षेसाठी 4 लाख 79 हजार 332 विद्यार्थ्यांनी नोंदणी केली होती. त्यापैकी 4 लाख 54 हजार 69 विद्यार्थ्यांनी प्रत्यक्ष परीक्षा दिली, म्हणजेच उपस्थितीचे प्रमाण 94.73 टक्के राहिले. परीक्षा देणाऱ्या विद्यार्थ्यांमध्ये 2 लाख 73 हजार 135 विद्यार्थी, 1 लाख 80 हजार 916 विद्यार्थिनी आणि 18 तृतीयपंथीय विद्यार्थ्यांचा समावेश होता.

राज्यातील 4 लाख 42 हजार 261 विद्यार्थ्यांनी तर राज्याबाहेरील 11 हजार 808 विद्यार्थ्यांनी ही परीक्षा दिली. राज्यातील 36 जिल्ह्यांतील 186 परीक्षा केंद्रांवरही परीक्षा घेण्यात आली. यंदा महाराष्ट्राबाहेरील कोणत्याही केंद्रावर सीईटी परीक्षा आयोजित करण्यात आलेली नव्हती.