"पुरावा दिल्यास क्षणभरही पदावर राहणार नाही"; एमपीएससीचे अध्यक्ष विवेक भीमनवार स्पष्टच बोलले
एमपीएससीचे अध्यक्ष विवेक भीमनवार यांनी प्रश्नपत्रिका फुटीच्या आरोपांवर प्रतिक्रिया दिली असून, पुराव्यांची मागणी केली आहे आणि परीक्षेतील पारदर्शकता सुधारण्यासाठी उचललेल्या पावलांवर प्रकाश टाकला आहे.
Eduvarta
एज्युवार्ता न्यूज नेटवर्क
महाराष्ट्र लोकसेवा आयोगाच्या अध्यक्ष विवेक भीमनवार यांनी पेपरफुटीच्या आरोपांबाबत स्पष्ट भूमिका घेतली आहे. " माझ्या विरोधात कोणी एक पुरावा जरी दिला तर क्षणभरही पदावर राहणार नाही", असे भीमनवार यांनी स्पष्टीकरण दिले आहे. औषध निरीक्षक परीक्षेच्या प्रश्नपत्रिका फुटीचा घटनाक्रम त्यांच्या पदभार स्वीकारण्यापूर्वीचा असल्याचे ते म्हणाले. या प्रकरणी तक्रार येताच आयोगाने पोलिसांत तक्रार दाखल केली असून तपास सुरू असल्याचे त्यांनी स्पष्ट केले. माझ्याविरोधात वैयक्तिक आणि प्रतिमा मलिन करणारे राजकीय आरोप सातत्याने केले जात असल्याची खंतही त्यांनी व्यक्त केली.
पुण्यात स्पर्धा परीक्षा विद्यार्थी आणि शिक्षकांनी ‘विद्यार्थी आक्रोश मोर्चा’ काढून अध्यक्षांच्या राजीनाम्याची मागणी केली होती. या पार्श्वभूमीवर भीमनवार यांनी थेट आव्हान दिले. “माझ्याविरोधात कुणी एकही ठोस पुरावा दिला, तर मी एक क्षणही या पदावर राहणार नाही,” असे त्यांनी स्पष्ट शब्दांत सांगितले. त्यांच्या मते सध्याचे आरोप राजकीय स्वरूपाचे असून वस्तुस्थिती वेगळी आहे.
पदभार स्वीकारल्यानंतर आयोगाच्या कामकाजात अनेक गुणात्मक आणि रचनात्मक सुधारणा केल्या गेल्या आहेत, असे अध्यक्षांनी सांगितले. आतापर्यंत स्पर्धा परीक्षांच्या आठ आणि सरळसेवा भरतीच्या ७६ चाळणी परीक्षा अशा एकूण ८४ परीक्षा यशस्वीपणे पार पडल्या आहेत. निकाल प्रक्रियेतील विलंब कमी करून १८ ते २१ दिवसांत निकाल जाहीर करणे शक्य झाले असून पुढे एका महिन्यात निकाल जाहीर करण्याचे नियोजन आहे.
भविष्यात अशा घटनांची पुनरावृत्ती टाळण्यासाठी आयोगाने उच्चस्तरीय समिती स्थापन केली आहे. राज्य सरकारनेही उच्चाधिकार समिती गठित केली आहे. भीमनवार यांनी आयोगाच्या पारदर्शकतेवर भर दिला असून विद्यार्थी आणि जनतेच्या विश्वासाची जबाबदारी पूर्ण करण्याचे आश्वासन दिले आहे.
