वैद्यकीय प्रवेशाची दुसरी यादी जाहीर; १० हजार ९३८ विद्यार्थ्यांना संधी
एमबीबीएस अभ्यासक्रमासाठी राज्यात एकूण ८ हजार ५७९ जागा उपलब्ध होत्या. त्यापैकी ८ हजार ४४२ विद्यार्थ्यांना दुसऱ्या फेरीत प्रवेशाची संधी मिळाली आहे.
Eduvarta
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा कक्षातर्फे (सीईटी कक्ष) शैक्षणिक वर्ष २०२६-२७ साठी वैद्यकीय शिक्षणातील एमबीबीएस आणि बीडीएस पदवी अभ्यासक्रमाच्या राज्य कोट्यातील केंद्रीभूत प्रवेश प्रक्रियेची दुसरी निवड यादी जाहीर करण्यात आली आहे. या फेरीत एमबीबीएस आणि बीडीएसच्या एकूण ११ हजार १९६ जागांपैकी १० हजार ९३८ विद्यार्थ्यांना प्रवेशाची संधी मिळाली असून, २५८ जागा अद्याप रिक्त राहिल्या आहेत.
एमबीबीएस अभ्यासक्रमासाठी राज्यात एकूण ८ हजार ५७९ जागा उपलब्ध होत्या. त्यापैकी ८ हजार ४४२ विद्यार्थ्यांना दुसऱ्या फेरीत प्रवेशाची संधी मिळाली आहे. यामध्ये शासकीय वैद्यकीय महाविद्यालयांतील ४ हजार ९१० जागा, खासगी महाविद्यालयांतील ३ हजार १४९ जागा आणि खासगी विद्यापीठांतील ३८३ जागांचा समावेश आहे.
बीडीएस अभ्यासक्रमासाठी राज्यात एकूण २ हजार ६१७ जागा उपलब्ध होत्या. त्यापैकी २ हजार ४९६ विद्यार्थ्यांना दुसऱ्या फेरीत प्रवेशाची संधी मिळाली आहे. यामध्ये शासकीय महाविद्यालयांतील ३०२, खासगी महाविद्यालयांतील २ हजार ११३ आणि खासगी विद्यापीठांतील ८१ जागांचा समावेश आहे.
दुसऱ्या फेरीत महाविद्यालयाचे वाटप झालेल्या विद्यार्थ्यांना प्रवेश निश्चित करण्यासाठी १३ सप्टेंबर ते १८ सप्टेंबर २०२६ या कालावधीत संबंधित महाविद्यालयात प्रत्यक्ष उपस्थित राहावे लागणार आहे. १४ सप्टेंबर २०२६ हा दिवस या प्रक्रियेतून वगळण्यात आला आहे. विद्यार्थ्यांनी सायंकाळी ५.३० वाजेपर्यंत आवश्यक असलेली मूळ कागदपत्रे आणि प्रवेश शुल्काचा डिमांड ड्राफ्ट घेऊन महाविद्यालयात उपस्थित राहणे आवश्यक आहे.
बँकेला सुट्टी असलेल्या दिवशी शुल्क भरण्यासाठी धनादेशाद्वारे रक्कम जमा करण्याची परवानगी दिली जाऊ शकते. मात्र, त्यानंतरच्या कामकाजाच्या दिवशी संबंधित विद्यार्थ्याला धनादेशाऐवजी डिमांड ड्राफ्ट सादर करणे बंधनकारक राहणार आहे. निर्धारित वेळेत डिमांड ड्राफ्ट सादर न केल्यास संबंधित विद्यार्थ्याचा प्रवेश रद्द होऊ शकतो, असा इशारा सीईटी कक्षाने दिला आहे.
एमबीबीएस आणि बीडीएस अभ्यासक्रमाच्या दुसऱ्या फेरीतील प्रवेशामुळे वैद्यकीय शिक्षणासाठी प्रवेशाच्या प्रतीक्षेत असलेल्या विद्यार्थ्यांना मोठी संधी उपलब्ध झाली आहे. महाविद्यालयाचे वाटप झालेल्या विद्यार्थ्यांनी प्रवेशाच्या अंतिम मुदतीची वाट न पाहता आवश्यक कागदपत्रे आणि शुल्काची पूर्तता करून प्रवेश निश्चित करावा, असे आवाहन महाराष्ट्र राज्य सीईटी कक्षाने केले आहे.
