मुलींसाठी अकरावी प्रवेशात स्वतंत्र विशेष फेरी; शालेय शिक्षण विभागाचा महत्त्वपूर्ण निर्णय
प्रथम तीन नियमित फेऱ्या गुणवत्तेनुसार आणि सामाजिक आरक्षणाच्या नियमांनुसार घेतल्या जातील. त्यानंतर रिक्त जागांसाठी ‘सर्वांसाठी खुली’ फेरी घेण्यात येईल. या चार फेऱ्या संपल्यानंतर पाचवी विशेष फेरी केवळ मुलींसाठी राबवली जाईल.
eduvarta@gmail.com 
एज्युवार्ता न्यूज नेटवर्क
शैक्षणिक वर्ष २०२६-२७ (Academic year 2026-27) पासून राज्यातील अकरावी (FYJC) प्रवेश प्रक्रिया पूर्णपणे केंद्रीकृत ऑनलाइन (11th Admission Process) पद्धतीने राबवली जाणार असून, मुलींना अधिक संधी उपलब्ध करून देण्यासाठी स्वतंत्र विशेष फेरी (Special Round for Girls) घेण्याचा निर्णय शालेय शिक्षण आणि क्रीडा विभागाने (Education Department decision) घेतला आहे. हा निर्णय मुलींच्या शिक्षणाला प्रोत्साहन देण्यासाठी आणि रिक्त जागा भरण्यासाठी उपयुक्त ठरणार असल्याचे मानले जात आहे. शालेय शिक्षण विभागाने यासंदर्भातील शासन निर्णय जारी केला आहे.
शालेय शिक्षण विभागाने दिलेल्या माहितीनुसार, नवीन प्रणालीअंतर्गत एकूण पाच फेऱ्या होतील. यामध्ये प्रथम तीन नियमित फेऱ्या गुणवत्तेनुसार आणि सामाजिक आरक्षणाच्या नियमांनुसार घेतल्या जातील. त्यानंतर रिक्त जागांसाठी ‘सर्वांसाठी खुली’ फेरी घेण्यात येईल. या चार फेऱ्या संपल्यानंतर पाचवी विशेष फेरी केवळ मुलींसाठी राबवली जाईल. या फेरीत मुलींच्या गुणवत्तेनुसार प्रवेश दिले जातील.
यापूर्वी प्रवेश प्रक्रियेत अनेक अडचणी येत असल्याने यंदा संपूर्ण प्रक्रिया अधिक पारदर्शक आणि सुसूत्रित करण्यावर भर देण्यात आला आहे. राज्यातील सर्व मान्यताप्राप्त उच्च माध्यमिक शाळा आणि कनिष्ठ महाविद्यालयांमधील कला, वाणिज्य व विज्ञान शाखांसाठी ही एकच ऑनलाइन प्रणाली लागू राहील.विद्यार्थ्यांची नोंदणी प्रक्रिया एप्रिल महिन्यात सुरू झाली असून, दहावीचा निकाल लागल्यानंतर अर्जाचा भाग-२ भरण्याची सुविधा उपलब्ध होईल. विभागाने शैक्षणिक वर्ग १५ जुलै २०२६ पर्यंत सुरू करण्याचे निर्देश दिले आहेत.
शिक्षणतज्ज्ञांच्या मते, मुलींसाठी स्वतंत्र फेरीमुळे विशेषतः ग्रामीण भागातील आणि आर्थिकदृष्ट्या कमकुवत कुटुंबातील मुलींना चांगल्या महाविद्यालयात प्रवेश मिळण्याची शक्यता वाढेल. सध्या अकरावी प्रवेशात मुलींच्या संख्येत वाढ होत असली तरी, काही लोकप्रिय महाविद्यालयांमध्ये जागा मिळणे कठीण जाते. या विशेष फेरीमुळे ती अडचण दूर होण्याची शक्यता वर्तवण्यात आली आहे.
पालक आणि विद्यार्थी संघटनांनी या निर्णयाचे स्वागत केले असून, प्रक्रिया अधिक सोपी आणि वेळेवर पूर्ण व्हावी, अशी अपेक्षा व्यक्त केली आहे. अधिकृत वेळापत्रक लवकरच महाफायजेएडमिशन्स पोर्टलवर mahafyjcadmissions.in उपलब्ध होणार आहे.
