गरवारे महाविद्यालयाच्या ग्रंथालयातील वाचन कक्षाला ‘प्रा. द. मा. मिरासदार ग्रंथदालन’ नाव

एज्युवार्ता न्यूज नेटवर्क 

सुप्रसिद्ध साहित्यिक, कथाकथनकार आणि महाराष्ट्र एज्युकेशन सोसायटीच्या गरवारे महाविद्यालयाचे माजी प्राध्यापक प्रा. द. मा. मिरासदार यांच्या जन्मशताब्दी वर्षानिमित्त तसेच गरवारे महाविद्यालयाच्या हिरक महोत्सवानिमित्त विशेष कार्यक्रमाचे आयोजन करण्यात आले. यावेळी प्रा. मिरासदार यांच्या साहित्यिक योगदानाला अभिवादन करण्यात आले.

या प्रसंगी महाविद्यालयाच्या ग्रंथालयातील वाचन कक्षाचे ‘प्रा. द. मा. मिरासदार ग्रंथदालन’ असे नामकरण करण्याचा निर्णय जाहीर करण्यात आला. प्रा. मिरासदार यांनी १९६९ ते १९८७ या कालावधीत महाविद्यालयात मराठीचे प्राध्यापक म्हणून सेवा बजावली. ग्रामीण जीवनातील विनोद, बोलीभाषेचा प्रभाव आणि सहजसुंदर कथनशैलीच्या माध्यमातून त्यांनी मराठी साहित्यविश्वात स्वतंत्र ठसा उमटविला. त्यांच्या कथाकथनाने महाराष्ट्रातील साहित्य व सांस्कृतिक क्षेत्राला समृद्ध केले.

कार्यक्रमाला माजी केंद्रीय मंत्री व महाविद्यालयाचे माजी विद्यार्थी प्रकाश जावडेकर, महाराष्ट्र एज्युकेशन सोसायटीचे अध्यक्ष एअर मार्शल भूषण गोखले (निवृत्त),पुणे पुस्तक महोत्सवाचे आयोजक राजेश पांडे,मएसो नियामक मंडळाचे अध्यक्ष बाबासाहेब शिंदे, कोहिनूर ग्रुपचे कृष्णकुमार गोयल यांच्यासह संस्थेचे पदाधिकारी, प्राध्यापक, विद्यार्थी आणि साहित्यप्रेमी मोठ्या संख्येने उपस्थित होते.

प्रा. मिरासदार यांच्या स्मृतींना उजाळा देताना त्यांच्या साहित्यिक योगदानाबरोबरच महाविद्यालयाशी असलेल्या ऋणानुबंधांचेही स्मरण करण्यात आले. त्यांच्या नावाने ग्रंथदालन सुरू करण्याचा निर्णय हा साहित्य, वाचन आणि ज्ञानाची परंपरा पुढील पिढ्यांपर्यंत पोहोचविणारा महत्त्वपूर्ण उपक्रम ठरणार आहे.

ज्ञान, साहित्य आणि वाचनाची परंपरा जपणे हीच साहित्यिक वारशाला खरी आदरांजली असून, प्रा. द. मा. मिरासदार यांचे नाव ग्रंथदालनाला देणे ही त्यांच्या साहित्यिक योगदानाची आणि महाविद्यालयाशी असलेल्या जिव्हाळ्याच्या नात्याची कायमस्वरूपी आठवण ठरेल, अशी भावना यावेळी व्यक्त करण्यात आली.