सीईटीच्या कॅप-२ फेरीत खासगी वैद्यकीय विद्यापीठांच्या ५५० जागा उपलब्ध
शासनाने लता मंगेशकर युनिव्हर्सिटी आणि डॉ. बाळासाहेब विखे पाटील विद्यापीठ यांना खासगी विद्यापीठ म्हणून मान्यता दिल्यानंतर या महाविद्यालयांतील जागा राज्याच्या केंद्रीभूत प्रवेश प्रक्रियेतून भरण्याचा निर्णय घेण्यात आला आहे.
Eduvarta
एज्युवार्ता न्यूज नेटवर्क
राज्यातील दोन खासगी विद्यापीठांच्या अंतर्गत येणाऱ्या वैद्यकीय व दंत महाविद्यालयांमधील एकूण ५५० जागा महाराष्ट्र राज्य सामाईक प्रवेश परीक्षा कक्षामार्फत (सीईटी सेल) केंद्रीभूत प्रवेश फेरी-२ पासून उपलब्ध करून देण्यात येणार आहेत. यामध्ये एमबीबीएसच्या ४५०, तर बीडीएसच्या १०० जागांचा समावेश आहे.दरम्यान, उपलब्ध झालेल्या नव्या जागांच्या पार्श्वभूमीवर विद्यार्थ्यांना चॉईस प्रेफरन्स (पसंतीक्रम) भरण्यास तसेच आधी भरलेल्या पसंतीक्रमात बदल करण्यासाठी १२ सप्टेंबर २०२६ रोजी सकाळी १० वाजेपर्यंत मुदतवाढ देण्यात आली आहे.
नागपूर येथील लता मंगेशकर युनिव्हर्सिटी अंतर्गत एन.के.पी. साळवे वैद्यकीय महाविद्यालयातील एमबीबीएसच्या २५० आणि रणजीत देशमुख दंत महाविद्यालयातील बीडीएसच्या १०० जागा, तसेच अहिल्यानगर येथील डॉ. बाळासाहेब विखे पाटील विद्यापीठ अंतर्गत डॉ. विठ्ठलराव विखे पाटील फाऊंडेशनच्या मेडिकल कॉलेजमधील एमबीबीएसच्या २०० जागा सीईटीच्या केंद्रीभूत प्रवेश प्रक्रियेत समाविष्ट करण्यात आल्या आहेत.
शासनाने लता मंगेशकर युनिव्हर्सिटी आणि डॉ. बाळासाहेब विखे पाटील विद्यापीठ यांना खासगी विद्यापीठ म्हणून मान्यता दिल्यानंतर या महाविद्यालयांतील जागा राज्याच्या केंद्रीभूत प्रवेश प्रक्रियेतून भरण्याचा निर्णय घेण्यात आला आहे.
या महाविद्यालयांच्या एकूण प्रवेश क्षमतेपैकी ४० टक्के जागा महाराष्ट्र राज्यातील उमेदवारांसाठी राखीव राहणार आहेत. या जागांवर संविधानिक आरक्षण लागू असेल. उर्वरित ६० टक्के जागा अखिल भारतीय स्तरावर भरण्यात येणार असून, या जागांना कोणत्याही प्रकारचे आरक्षण लागू राहणार नाही.
अखिल भारतीय कोट्यातील या ६० टक्के जागांपैकी १५ टक्के जागा अनिवासी भारतीय (NRI) उमेदवारांसाठी राखीव ठेवण्यात येणार आहेत.
या खासगी विद्यापीठांमध्ये प्रवेश घेणाऱ्या विद्यार्थ्यांना कोणत्याही प्रकारच्या शिष्यवृत्ती योजनेचा लाभ लागू राहणार नसल्याचे सीईटी कक्षाने स्पष्ट केले आहे. त्यामुळे प्रवेश घेण्यापूर्वी विद्यार्थ्यांनी शुल्क व शिष्यवृत्तीबाबतच्या अटींची माहिती घेणे आवश्यक आहे.
उमेदवारांनी राज्य सीईटी कक्षाच्या संकेतस्थळावर प्रसिद्ध करण्यात आलेल्या सूचना क्रमांक १५ चे अवलोकन करून त्यानुसार पसंतीक्रम नोंदवावा, असे आवाहन करण्यात आले आहे.
--------------------------
एन.के.पी. साळवे वैद्यकीय महाविद्यालय, नागपूर — एमबीबीएस : २५०
रणजीत देशमुख दंत महाविद्यालय, नागपूर — बीडीएस : १००
डॉ. विठ्ठलराव विखे पाटील फाऊंडेशनचे मेडिकल कॉलेज, अहिल्यानगर — एमबीबीएस : २००
एकूण : ५५० जागा
