म.ए.सो. पूर्व प्राथमिक शाळेत ‘शब्द हंडी’ उत्साहात

एज्युवार्ता न्यूज नेटवर्क 

बारामती येथील म.ए.सो. पूर्व प्राथमिक विभागात श्रीकृष्ण जन्माष्टमीनिमित्त शुक्रवारी ४ सप्टेंबर रोजी दहीहंडी उत्सव उत्साहात साजरा करण्यात आला. यावेळी शिक्षकवृंद व मावशींच्या हस्ते श्रीकृष्ण पूजन करण्यात आले.

उत्सवाचे विशेष आकर्षण ठरलेल्या शब्द हंडी मध्ये विद्यार्थ्यांसाठी शब्दचिठ्ठ्या ठेवण्यात आल्या होत्या. विद्यार्थ्यांनी हंडी फोडल्यानंतर चिठ्ठ्यांमधील काना-मात्राविरहित सोपे शब्द वाचून दाखवले. शब्दवाचन पूर्ण करणाऱ्या विद्यार्थ्यांचे कौतुक करण्यात आले. या अभिनव उपक्रमामुळे विद्यार्थ्यांमध्ये शब्दओळख, वाचन कौशल्य आणि वाचनाची आवड विकसित होण्यास मदत झाली.

यावेळी चिमुकल्यांनी श्रीकृष्णाच्या विविध बाललीलांचे वर्गनिहाय सादरीकरण केले. मोठ्या गटातील विद्यार्थ्यांनी कृष्ण-सुदामा यांच्या मैत्रीवर आधारित नाटुकले सादर करून मैत्री, प्रेम, आपुलकी आणि समानतेचा संदेश दिला. या उपक्रमातून विद्यार्थ्यांना भारतीय संस्कृती आणि सण-उत्सवांचे महत्त्व समजावून देण्यात आले. चिमुकल्यांच्या उत्स्फूर्त सहभागामुळे शाळेचा परिसर कृष्णमय झाला.

शाळा समितीचे अध्यक्ष अजय पुरोहित, महामात्र डॉ. गोविंद कुलकर्णी, संस्थेचे सदस्य तसेच शाळेच्या मुख्याध्यापिका अनिता तावरे यांच्या मार्गदर्शनाखाली पूर्व प्राथमिक विभागातील शिक्षकवृंदाने कार्यक्रमाच्या यशस्वितेसाठी विशेष परिश्रम घेतले.