हरिभाऊ गजानन देशपांडे इंग्लिश मीडियम स्कूलमध्ये शिक्षक दिन व जन्माष्टमी उत्साहात

एज्युवार्ता न्यूज नेटवर्क

हरिभाऊ गजानन देशपांडे इंग्लिश मीडियम स्कूलमध्ये शुक्रवारी ४ सप्टेंबर रोजी शिक्षक दिन व श्रीकृष्ण जन्माष्टमीनिमित्त विविध शैक्षणिक, सांस्कृतिक आणि अनुभवाधारित उपक्रम उत्साहपूर्ण वातावरणात पार पडले. विद्यार्थ्यांमध्ये शिक्षकांविषयी आदर व कृतज्ञता, वाचनाची आवड, संघभावना तसेच भारतीय संस्कृतीची ओळख निर्माण करणे हा या उपक्रमांचा मुख्य उद्देश होता.

कार्यक्रमाची सुरुवात दीपप्रज्वलन आणि सरस्वती पूजनाने झाली. त्यानंतर भारताचे माजी राष्ट्रपती व महान शिक्षणतज्ज्ञ डॉ. सर्वपल्ली राधाकृष्णन यांच्या प्रतिमेचे सर्व शिक्षकांच्या हस्ते पूजन करण्यात आले.

इयत्ता दहावीच्या विद्यार्थ्यांनी सर्व शिक्षकांचा गुलाबपुष्प आणि स्वतः तयार केलेल्या पर्यावरणपूरक भेटवस्तू देऊन सत्कार केला. विद्यार्थ्यांनी शिक्षकांप्रती असलेला आदर, प्रेम आणि कृतज्ञता या माध्यमातून व्यक्त केली. वाचनालय उपक्रमांतर्गत विद्यार्थ्यांनी शिक्षकांविषयी कृतज्ञता व्यक्त करणारी भावपूर्ण पत्रेही लिहिली. शिक्षकांकडून मिळालेले मार्गदर्शन, संस्कार आणि प्रेरणा यांचा उल्लेख या पत्रांमधून करण्यात आला.

कार्यक्रमाचे विशेष आकर्षण ठरले ते ‘विद्यार्थी बनले शिक्षक’ या उपक्रमाचे. इयत्ता दहावीच्या विद्यार्थ्यांनी शिक्षकांची भूमिका पार पाडत अध्यापन केले. या अनुभवातून विद्यार्थ्यांना शिक्षकांचे कार्य, जबाबदारी आणि विद्यार्थ्यांच्या जडणघडणीत शिक्षकांचे योगदान याची प्रत्यक्ष जाणीव झाली.

दरम्यान, पूर्वप्राथमिक विभागात दहीहंडी उत्सव पारंपरिक आणि उत्साहपूर्ण वातावरणात साजरा करण्यात आला. बाळगोपाळांनी पारंपरिक वेशभूषेत सहभाग घेतला. शिक्षकांच्या मार्गदर्शनाखाली विद्यार्थ्यांनी स्वतः दही घुसळून लोणी तयार केले आणि त्याचा आस्वाद घेतला. या उपक्रमातून विद्यार्थ्यांना अनुभवाधारित शिक्षणासोबतच सहकार्य, स्वावलंबन आणि पौष्टिक आहाराचे महत्त्व समजले.

माध्यमिक विभागात ‘पुस्तक हंडी’ हा अभिनव ज्ञानवर्धक उपक्रम घेण्यात आला. विद्यार्थ्यांनी हाऊसनिहाय उत्स्फूर्त सहभाग नोंदविला. विजेत्या संघाला बक्षीस म्हणून हंडीतील पुस्तके देण्यात आली. विद्यार्थ्यांमध्ये वाचनाची गोडी निर्माण व्हावी, पुस्तकांशी मैत्री वाढावी आणि ज्ञानवृद्धीची सवय लागावी, या उद्देशाने हा उपक्रम राबविण्यात आला.

शिक्षक दिन, दहीहंडी आणि पुस्तक हंडी या विविध उपक्रमांमधून विद्यार्थ्यांना आनंदातून शिक्षण, अनुभवातून ज्ञान, वाचनाची आवड, संघभावना, सर्जनशीलता आणि शिक्षकांविषयी कृतज्ञता यांचा अनोखा अनुभव मिळाला.

सर्व उपक्रम आनंदी, उत्साहपूर्ण आणि संस्कारमय वातावरणात यशस्वीरीत्या संपन्न झाले. विद्यार्थ्यांच्या सर्वांगीण विकासासाठी शिक्षणासोबत संस्कार, संस्कृती आणि वाचनाची सांगड घालणारा हा उपक्रम कौतुकास्पद ठरला.