भारतीय दाम्पत्याचे अमेरिकन विद्यापीठाला १९० कोटींची देणगी; एआय काॅलेजची होणार स्थापना
भारतीय-अमेरिकन जोडपे विकास आणि अनुराधा सिन्हा यांनी नॉर्थ टेक्सास विद्यापीठाला नवीन एआय आणि प्रगत विश्लेषण महाविद्यालय स्थापन करण्यासाठी २० दशलक्ष डॉलर्सची देणगी दिली आहे.
Eduvarta
एज्युवार्ता न्यूज नेटवर्क
अमेरिकेतील मूळ भारतीय अभियंता दाम्पत्य विकास सिन्हा आणि अनुराधा सिन्हा यांनी युनिव्हर्सिटी ऑफ नॉर्थ टेक्सासला आर्टिफिशियल इंटेलिजन्स कॉलेज स्थापन करण्यासाठी २ कोटी डॉलर म्हणजे सुमारे १९० कोटी रुपये देणगी दिली आहे. या देणगीमुळे विद्यापीठात कृत्रिम बुद्धिमत्ता आणि प्रगत विश्लेषण या क्षेत्रातील शिक्षण व संशोधनाला मोठी चालना मिळणार आहे. विद्यापीठाने या देणगीचा सन्मान म्हणून नवीन महाविद्यालयाला ‘अनुराधा आणि विकास सिन्हा कॉलेज ऑफ आर्टिफिशियल इंटेलिजन्स अँड ॲडव्हान्स्ड ॲनालिटिक्स’ असे नाव देण्याचा निर्णय घेतला आहे. हे कॉलेज एआय आणि इंटेलिजेंट सिस्टमच्या विकासावर लक्ष केंद्रित करणारे महत्त्वाचे शैक्षणिक केंद्र बनेल.
या देणगीतून ६ कायमस्वरूपी निधी तयार केले जातील. त्यामध्ये महाविद्यालयीन नेतृत्व, शिष्यवृत्त्या, प्राध्यापक पदे, उद्योजकता आणि इनक्यूबेशन, प्रगत संशोधन तसेच उदयोन्मुख तंत्रज्ञान या बाबींचा समावेश असेल. नवीन कॉलेजमध्ये आर्टिफिशियल इंटेलिजन्स, सायबर सिक्युरिटी, डेटा सायन्स, हेल्थ इन्फॉर्मेटिक्स, इन्फॉर्मेशन सायन्स, लायब्ररी सायन्स आणि लर्निंग टेक्नॉलॉजी या विषयांचे कार्यक्रम राबवले जातील. शिवाय सामायिक पायाभूत सुविधा, संशोधन प्रकल्प आणि उद्योग भागीदारीद्वारे संशोधक व विद्यार्थी एकमेकांना जोडले जातील.
विकास सिन्हा यांनी सांगितले की, आर्टिफिशियल इंटेलिजन्स ही आपल्या पिढीसाठी सर्वात महत्त्वाची तंत्रज्ञान असेल. विद्यापीठ या क्षेत्रात प्रमुख भूमिका बजावेल आणि भविष्यातील तंत्रज्ञान साकारणाऱ्या तरुणांना तयार करेल. कॉलेजमध्ये दोन शैक्षणिक विभाग असतील. एक विभाग इंटेलिजेंट सिस्टम्सच्या विकासावर तर दुसरा विभाग माहिती आणि इंटेलिजेंट सिस्टम्सच्या वापरावर लक्ष केंद्रित करेल.
विकास आणि अनुराधा सिन्हा यांनी वेंकटेश्वर विद्यापीठातून सिव्हिल इंजिनिअरिंगची पदवी घेतली. नंतर ते अमेरिकेत गेले आणि फ्लोरिडा अटलांटिक युनिव्हर्सिटीतून पदवी पूर्ण केली. विकास सिन्हा यांनी नॉर्थवेस्टर्न युनिव्हर्सिटीनंतर युनिव्हर्सिटी ऑफ नॉर्थ टेक्सासमध्ये डॉक्टरेट पूर्ण केली. सध्या ते ब्रॉडकॉम कंपनीत मेनफ्रेम सॉफ्टवेअर विभागाचे व्हाइस प्रेसिडेंट आहेत. दाम्पत्याने २०२३ पासून विद्यापीठाच्या कॉलेज अँड इन्फॉर्मेशन लीडरशिप बोर्डात सक्रिय सहभाग घेतला आहे.
यापूर्वीही सिन्हा दांपत्याने विद्यापीठाच्या डेटा सायन्स कार्यक्रमांना पाठिंबा दिला होता. २०२४ मध्ये त्यांनी अनुराधा आणि विकास सिन्हा डेटा सायन्स विभागाची स्थापना करण्यास मदत केली. त्यानंतर २०२५ मध्ये सिन्हा इनोव्हेशन लॅब फॉर डेटा सायन्सची निर्मिती केली. ही नवीन देणगी त्यांच्या सातत्यपूर्ण योगदानाला आणखी एक महत्वाचे पायरी मानली जात आहे.
