वैद्यकीय अभ्यासक्रमात ५६ टक्के शुल्कवाढ; १३ लाखांची वार्षिक फी यंदा २१ लाखांवर गेली
महाराष्ट्रातील पहिली खाजगी वैद्यकीय संस्था असलेल्या 'एन.के.पी. साळवे इन्स्टिट्यूट'ने एमबीबीएसच्या शुल्कात ५६ टक्क्यांनी वाढ करून ते वार्षिक २१.७५ लाख रुपये केले आहे. नवीन शुल्क रचना आणि त्याचे परिणाम यांबाबतची सविस्तर माहिती.
Eduvarta
एज्युवार्ता न्यूज नेटवर्क
राज्यातील पहिल्या खासगी वैद्यकीय विद्यापीठाचा दर्जा मिळालेल्या नागपूरच्या एनकेपी साळवे वैद्यकीय विज्ञान संस्थेने एमबीबीएस अभ्यासक्रमाच्या शुल्कात मोठी वाढ केली आहे. गेल्या वर्षी प्रतिवर्ष १३ लाख ९५ हजार रुपये असलेले शुल्क आता २१ लाख ७५ हजार रुपयांवर पोहोचले आहे. या वाढीचे प्रमाण तब्बल ५६ टक्के आहे. विद्यापीठाने जाहीर केलेल्या नवीन शुल्करचनेत दरवर्षी साडेसात टक्के वाढ करण्याची तरतूदही करण्यात आली आहे. ही वाढ विद्यार्थ्यांना आणि पालकांना आर्थिकदृष्ट्या मोठा भार ठरू शकते.
राज्याच्या शुल्क नियामक प्राधिकरणाने (एफआरए) २०२५-२६ या शैक्षणिक वर्षासाठी महाविद्यालयाचे वार्षिक शुल्क १३ लाख ९५ हजार रुपये निश्चित केले होते. महाविद्यालयाने चालू वर्षासाठी शुल्क निश्चितीचा प्रस्ताव एफआरएकडे सादर केला होता. मात्र, ही प्रक्रिया सुरू असतानाचराज्य मंत्रिमंडळाने संस्थेचे खासगी विद्यापीठात रूपांतर करण्यास मंजुरी दिली. त्यामुळे नव्या विद्यापीठाला शुल्करचनेसाठी एफआरएची मंजुरी घेण्याची गरज राहिली नाही आणि त्यांनी स्वतंत्रपणे शुल्क ठरवले.
नव्या शुल्करचनेनुसार राज्य कोटा आणि अखिल भारतीय कोट्यातील जागांसाठी शिक्षण व विकास शुल्क मिळून प्रतिवर्ष २० लाख ७५ हजार रुपये आकारले जाणार आहेत. याशिवाय दरवर्षी एक लाख रुपये विद्यापीठ शुल्क आणि ५० हजार रुपयांची परतावायोग्य अनामत रक्कम देणे बंधनकारक आहे. अशा प्रकारे एकूण वार्षिक शुल्क २१ लाख ७५ हजार रुपये होईल. अनिवासी भारतीय (एनआरआय) आणि ओव्हरसीज सिटीझन ऑफ इंडिया (ओसीआय) कोट्यातील विद्यार्थ्यांसाठी वार्षिक शुल्क ४६ हजार ६५० डॉलर निश्चित करण्यात आले आहे.
संस्थात्मक कोट्यातील विद्यार्थ्यांसाठी मात्र प्रतिवर्ष तब्बल ४३ लाख रुपये शुल्क आकारले जाणार आहे. विद्यापीठाच्या या निर्णयामुळे वैद्यकीय शिक्षणाचा खर्च लक्षणीयरीत्या वाढला असून, भविष्यातही साडेसात टक्के वार्षिक वाढ सुरू राहील. ही बाब राज्यातील वैद्यकीय शिक्षणाच्या खासगीकरणाच्या प्रक्रियेशी संबंधित चर्चा पुन्हा उफाळून आणण्याची शक्यता आहे.
