एसएससीचे कडक नियम: परीक्षा केंद्रावर कॉम्प्युटर सिस्टीममध्ये छेडछाड करणाऱ्यांवर कठोर कारवाई
एसएससीने संगणक-आधारित परीक्षा केंद्रांवर अधिकृत परवानगीशिवाय संगणक रीस्टार्ट करणे, शटडाऊन करणे आणि प्रणालीमध्ये बदल करण्यास मनाई करणारी एक महत्त्वाची सूचना जारी केली आहे.
Eduvarta
एज्युवार्ता न्यूज नेटवर्क
कर्मचारी निवड आयोगाने (एसएससी) संगणक आधारित भरती परीक्षांमध्ये सहभागी होणाऱ्या उमेदवारांसाठी आणि परीक्षा केंद्रांवर काम करणाऱ्या कर्मचाऱ्यांसाठी एक महत्त्वपूर्ण ॲडव्हायजरी जारी केली आहे. आयोगाने स्पष्ट केले आहे की, परीक्षेदरम्यान उमेदवार किंवा केंद्र कर्मचारी स्वतःहून कॉम्प्युटर रीस्टार्ट, शटडाउन किंवा सिस्टीम बदलू शकणार नाहीत. अशा कोणत्याही कृतीसाठी अधिकृत परीक्षा स्टाफची परवानगी आणि ठरवून दिलेली प्रक्रिया पाळणे अनिवार्य आहे. या निर्णयाने परीक्षा प्रक्रिया अधिक पारदर्शक आणि निष्पक्ष ठेवण्याचा प्रयत्न केला आहे.
मागील काही परीक्षांमध्ये असे प्रकार समोर आले होते की तांत्रिक अडचण नसतानाही उमेदवारांनी किंवा कर्मचाऱ्यांच्या मदतीने कॉम्प्युटर सिस्टीम रीस्टार्ट केली किंवा त्यात हस्तक्षेप केला. आयोगाच्या मते अशा हालचालींमुळे परीक्षेची निष्पक्षता धोक्यात येऊ शकते. म्हणूनच नवीन नियमांनुसार उमेदवारांना सिस्टीममध्ये कोणताही स्वतःचा बदल करण्याची परवानगी नाही. कॉम्प्युटर किंवा मॉनिटर बदलण्यावरही पूर्ण बंदी घालण्यात आली आहे.
जर परीक्षा सुरू होण्यापूर्वी किंवा चालू असताना कॉम्प्युटरमध्ये तांत्रिक समस्या उद्भवली तर उमेदवाराने स्वतः दुरुस्तीचा प्रयत्न करू नये. अशा वेळी तात्काळ सेंटर स्टाफ, इनविजिलेटर किंवा परीक्षा कर्मचाऱ्यांना कळवावे. त्यानंतर केंद्र कर्मचारी समस्या तपासतील आणि आवश्यक कारवाई करतील. प्रादेशिक कार्यालयाचे प्रतिनिधी, इन्व्हेस्टिगेटिंग ऑफिसर किंवा केंद्र कोऑर्डिनेटर यांची परवानगी घेतल्याशिवाय कोणतेही पाऊल उचलले जाणार नाही.
एसएससीने स्पष्ट इशारा दिला आहे की विनापरवानगी सिस्टीमसोबत छेडछाड करताना आढळल्यास संबंधित उमेदवार किंवा कर्मचाऱ्याविरुद्ध कठोर कारवाई होईल. ही कारवाई परीक्षेच्या लागू नियमांनुसार आणि परीक्षा नोटीसमधील तरतुदींनुसार केली जाईल. आयोगाने सर्वांना अनावश्यक हस्तक्षेप टाळण्याचे आवाहन केले आहे जेणेकरून परीक्षा सुरळीत पार पडेल.
ही ॲडव्हायजरी सर्व उमेदवार आणि केंद्र कर्मचाऱ्यांसाठी बंधनकारक आहे. त्यामुळे परीक्षा केंद्रावर शिस्त राखणे आणि नियमांचे पालन करणे अत्यंत आवश्यक ठरले आहे. निष्पक्ष परीक्षा प्रक्रिया सुनिश्चित करण्यासाठी एसएससीने हा महत्त्वाचा निर्णय घेतला आहे.
