SPPU : आपलीच माणसे सर्व ठिकाणी बसवण्याचा अट्टाहास! राज्यपाल करणार का हस्तक्षेप?
महाराष्ट्राचे राज्यपाल आणि विद्यापीठाचे कुलपती या नात्याने तुम्ही या प्रकरणात हस्तक्षेप करून विद्यापीठाच्या कामकाजाचा सर्वंकष आढावा घ्यावा, अशी मागणी संतोष ढोरे यांनी राज्यपालांकडे केली आहे.
eduvarta@gmail.com 
एज्युवार्ता न्यूज नेटवर्क
NIRF Ranking मध्ये सावित्रीबाई फुले पुणे विद्यापीठाचे (SPPU) स्थान कमालीचे घसरले आहे. विद्यापीठ सर्व शैक्षणिक संस्थाच्या (Educational Institutes) क्रमवारीत ३५ व्या स्थानावर तर विद्यापीठांच्या गटात १९ व्या क्रमांकावर फेकले गेले आहे. विद्यापीठाचे स्थान पूर्ववत करण्यासाठी हस्तक्षेप करून कामकाजाचा आढावा घेण्याची मागणी माजी अधिसभा सदस्य संतोष ढोरे (Santosh Dhore) यांनी राज्यपाल रमेश बैस (Governor Ramesh Bais) यांच्याकडे केली आहे. विद्यापीठातील काही अधिकारी आपलीच माणसे सर्व ठिकाणी बसवण्याचा अट्टाहास करत आहेत. मग चुकीची माणसे चुकीचा डेटा पुरवण्याचे काम करतात आणि त्याच्यामुळे विद्यापीठाची मानहानी होत असल्याचा आरोपही ढोरे यांनी केला आहे. (Santosh Dhore seeks Governor's intervention on SPPU's decline in ranking)
संतोष ढोरे यांनी राज्यपाल व कुलपती रमेश बैस यांना पत्र लिहिले आहे. त्यांनी पत्रात म्हटले आहे की, मागील वर्षी पुणे विद्यापीठ सर्वच संस्थांच्या गटात २५ व्या स्थानावर होते. २०२० मध्ये विद्यापीठ गैटात नवव्या क्रमांकावर असलेल्या विद्यापीठाची ही घसरण चिंता वाढवणारी आहे. ही उच्च शिक्षणाची एक प्रतिष्ठित संस्था म्हणून ओळखली जाते. विद्यापीठाच्या क्रमवारीतील घसरणीमुळे विद्यार्थ्यांना पुरविल्या जाणाऱ्या शिक्षण आणि पायाभूत सुविधांच्या गुणवत्तेबाबत अनेक चिंता निर्माण होतात. या घसरणीमागील कारणे समजून घेणे आणि देशातील अग्रगण्य शैक्षणिक संस्था म्हणून विद्यापीठाचे स्थान पूर्ववत करण्यासाठी तातडीने उपाययोजना करणे आवश्यक आहे.
महाराष्ट्राचे राज्यपाल आणि विद्यापीठाचे कुलपती या नात्याने तुम्ही या प्रकरणात हस्तक्षेप करून विद्यापीठाच्या कामकाजाचा सर्वंकष आढावा घ्यावा. ही घसरण होण्यास कारणीभूत असलेल्या घटकांचे मूल्यांकन करणे आणि सुधारणा आवश्यक असलेली क्षेत्रे ओळखणे महत्त्वाचे आहे. एक संबंधित नागरिक या नात्याने माझा विश्वास आहे की आपल्या राज्याच्या आणि राष्ट्राच्या सर्वागीण प्रगती आणि विकासासाठी आपल्या शैक्षणिक संस्थांचे संगोपन आणि बळकटीकरण आवश्यक आहे, असे पत्रात नमूद केले आहे.
NIRF 2023 : सावित्रीबाई फुले पुणे विद्यापीठाच्या रँकिंगमध्ये मोठी घसरण; देशात ३५ व्या क्रमांकावर
सावित्रीबाई फुले पुणे विद्यापीठातील विद्यार्थी, प्राध्यापक आणि भागधारकांचा आत्मविश्वास पुनर्संचयित करणे आणि ज्ञानाच्या शोधासाठी समर्पित एक प्रमुख संस्था म्हणून त्याची प्रतिष्ठा पुन्हा स्थापित करणे अत्यावश्यक आहे. विद्यापीठातील काही अधिकारी आपलीच माणसे सर्व ठिकाणी बसवण्याचा अट्टहास करत असल्याचे पाहण्यास आले आहे. मग चुकीची माणसे चुकीचा डेटा पुरवण्याचे काम करतात आणि त्याच्यामुळे विद्यापीठाची मानहानी होते. तसेच यावर्षी विद्यापीठाने अटल रँकिंग चा अर्ज का भरण्यात आला नाही.? विद्यापीठाच्या घसरलेल्या रँकिंगमुळे एकंदरीत कार्यपद्धतीवरच प्रश्नचिन्ह उपस्थित झाले आहे, असेही ढोरे यांनी पत्रात म्हटले आहे.
मला तुमच्या दूरदृष्टीवर आणि शैक्षणिक उन्नतीसाठी वचनबद्धतेवर पूर्ण विश्वास आहे. तुम्ही या प्रकरणावर त्वरित कारवाई कराल. मी प्रामाणिकपणे आशा करतो की केलेल्या प्रयत्नांमुळे विद्यापीठाचे रँकिंग पुनर्संचयित होईल आणि विद्यार्थ्यांना जागतिक दर्जाच्या शिक्षणाची तरतूद सुनिश्चित होईल, अशी अपेक्षा ढोरे यांनी व्यक्त केली आहे.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
