नागपूर विद्यापीठाच्या कुलगुरू पदी कोण?;दिग्गजांची नावे झाली गायब

एज्युवार्ता न्यूज नेटवर्क 

राष्ट्रसंत तुकडोजी महाराज नागपूर विद्यापीठाच्या (Rashtrasant Tukadoji Maharaj Nagpur University) कुलगुरू पदाच्या शर्यतीमध्ये असलेल्या अनेक दिग्गजांची नावे कापण्यात आली आहेत. त्यामुळे आता विद्यापीठाच्या कुलगुरू पदी कोण विराजमान  होणार ? याची सर्वांना उच्छुकता लागलेली आहे. कुलगुरूपदाच्या (Election to the post of Vice-Chancellor) शर्यथीमध्ये गोंडवाना विद्यापीठाचे कुलगुरू डॉ. प्रशांत बोकारे, माजी प्रभारी प्र-कुलगुरू डॉ. राजेंद्र काकडे, डॉ. नीरज खटी (Dr. Prashant Bokare, Dr. Rajendra Kakade, Dr. Neeraj Khati) यांचा समावेश होता. त्यांनाही कुलगुरूपदाच्या मुलाखतीसाठी बोलावले जाईल, अशी अपेक्षा व्यक्त केली जात होती. मात्र,अनेक दिग्गजांना धक्का देण्यात आला आहे. 

गेल्या दोन महिन्यांपासून रखडलेली राष्ट्रसंत तुकडोजी महाराज नागपूर विद्यापीठाच्या कुलगुरू निवडीच्या प्रक्रियेला अखेर मुहूर्त सापडला आहे. या पदासाठी निवड झालेल्या अंतिम ५ उमेदवारांच्या मुलाखती ३० नोव्हेंबर रोजी राज्यपाल यांच्यासमोर पार पडल्या. त्यामुळे गेल्या दीड वर्षापासून प्रभारीच्या भरवशावर सुरू असलेल्या विद्यापीठाला आता नवीन कुलगुरू मिळतील, अशी शक्यता निर्माण झाली आहे. 

हेही वाचा - फक्त 25 हजारात AI टीचर रोबोट तयार; बारावीच्या विद्यार्थ्याची कमाल

'या' पाच नावांपैकी एकाची कुलगुरू पदी वर्णी

पाच उमेदवारांमध्ये दत्ता मेघे संस्थेतील तांत्रिक विभागाच्या संचालक डॉ. मनाली क्षीरसागर, निवृत्त प्रभारी प्र-कुलगुरू डॉ. सुभाष कोंडावार, श्री शिवाजी शिक्षण संस्था अमरावतीच्या डॉ. स्मिता देशमुख, छत्रपती संभाजीनगरचे डॉ. प्रशांत पाटील आणि आयआयटी रुरकीचे डॉ. मोहनलाल कोल्हे यांचा समावेश आहे. डॉ. कोंडावार यांच्या रूपाने नागपूर विद्यापीठात सेवा देणारे एकमेव उमेदवार या मुलाखतीसाठी निवडले आहेत. विशेष म्हणजे भाजपच्या एका मोठ्या नेत्याच्या नातेवाइकाचाही यामध्ये समावेश असल्याचं बोललं जात आहे. 

नव्या कुलगुरूंच्या अध्यक्षतेत होणार सिनेट सभा? 

नागपूर विद्यापीठाची सिनेट सभा येत्या ५ डिसेंबर रोजी होणार आहे. ३० नोव्हेंबरला पाच उमेदवारांच्या मुलाखतीनंतर कुलगुरू यांचे नाव अंतिम झाल्यास या नव्या कुलगुरूंच्या अध्यक्षते खालीच अधिसभा होईल, अशीही शक्यता वर्तवण्यात येत आहे.मात्र, बऱ्याच वेळा मुलाखती झाल्यानंतर काही महिन्यांनंतर कुलगुरूंचे नाव जाहीर केले जाते.त्यामुळे 5 डिसेंबरपर्यंत नाव जाहीर होणार का? हे पाहणे उत्सुकतेचे आहे.