भावे प्राथमिक शाळेत सामाजिक रक्षाबंधन उत्साहात

एज्युवार्ता न्यूज नेटवर्क 

महाराष्ट्र एज्युकेशन सोसायटीच्या भावे प्राथमिक शाळेत सामाजिक बांधिलकी, बंधुभाव आणि पर्यावरण संवर्धनाचा संदेश देत सामाजिक रक्षाबंधन उपक्रम उत्साहात साजरा करण्यात आला. मुख्याध्यापिका सौ. ललिता कारंडे यांच्या मार्गदर्शनाखाली विविध उपक्रमांचे आयोजन करण्यात आले.

मेळघाट येथील आदिवासी बांधवांनी बांबूपासून तयार केलेल्या पर्यावरणपूरक राखी साहित्याचा वापर करून विद्यार्थ्यांनी आकर्षक राख्या तयार केल्या. विद्यार्थ्यांनी तयार केलेल्या या राख्यांचे शाळेत प्रदर्शनही भरविण्यात आले. त्यानंतर विविध क्षेत्रांत कार्यरत मान्यवर तसेच सेवाभावी व्यक्तींना या पर्यावरणपूरक राख्या बांधून त्यांच्याप्रती कृतज्ञता व्यक्त करण्यात आली.

विद्यार्थ्यांना सुरक्षितपणे शाळेत आणणे आणि शाळा सुटल्यानंतर त्यांना घरी सुखरूप पोहोचविण्याचे महत्त्वपूर्ण कार्य करणाऱ्या व्हॅनचालक काकांना विद्यार्थिनींनी राखी बांधून त्यांचे आभार मानले. तसेच पुणे महानगरपालिका अग्निशामक दलातील जवानांना राखी बांधून त्यांच्या धाडसी कार्याला आणि समाजाच्या सुरक्षिततेसाठी दिलेल्या योगदानाला मानवंदना देण्यात आली.

याचबरोबर पुणे विद्यार्थी गृह येथील वसतिगृहातील विद्यार्थ्यांना राख्या बांधून बंधुभावाचा संदेश देण्यात आला. सामाजिक रक्षाबंधनाच्या माध्यमातून विद्यार्थ्यांमध्ये कृतज्ञता, सामाजिक बांधिलकी, बंधुभाव आणि पर्यावरण संवर्धनाची भावना रुजविण्याचा प्रयत्न करण्यात आला.

या उपक्रमाचे शाळा समितीचे अध्यक्ष डॉ. दिलीप शेठ, महामात्रा डॉ. मानसी भाटे, मुख्याध्यापिका सौ. ललिता कारंडे आणि उपमुख्याध्यापिका सौ. वृषाली ठकार यांनी कौतुक केले. विद्यार्थ्यांनी व शिक्षकांनी घेतलेल्या मेहनतीचे आणि उपक्रमाच्या यशस्वी आयोजनाचे त्यांनी विशेष अभिनंदन केले.