विद्यार्थ्यांसाठी ‘समर्थ’ चित्रपटाचे विशेष स्क्रीनिंग
कार्यक्रमाचे विशेष आकर्षण म्हणजे चित्रपटातील कलाकार तसेच निर्मिती चमूतील सदस्यांसोबत आयोजित करण्यात आलेले संवादात्मक सत्र. या सत्रामुळे विद्यार्थ्यांना कलाकारांशी थेट संवाद साधण्याची आणि चित्रपट निर्मिती प्रक्रियेविषयी जाणून घेण्याची अनोखी संधी मिळाली.
Eduvarta
एज्युवार्ता न्यूज नेटवर्क
महाराष्ट्र एज्युकेशन सोसायटीच्या या नामांकित संस्थेच्या पुण्यातील बाल शिक्षण मंदीर शाळेतील इयत्ता पाचवी ते दहावीच्या विद्यार्थ्यांसाठी ‘समर्थ’ या चित्रपटाचे विशेष स्क्रीनिंग सिटी प्राईड येथे आयोजित करण्यात आले. विद्यार्थ्यांना मनोरंजनासोबतच शैक्षणिक व प्रेरणादायी अनुभव मिळावा, या उद्देशाने या उपक्रमाचे आयोजन करण्यात आले होते.
हा कार्यक्रम अत्यंत नियोजनबद्ध आणि शिस्तबद्ध पद्धतीने पार पडला. सर्व शिक्षक विद्यार्थ्यांसोबत उपस्थित होते. त्यांनी विद्यार्थ्यांची सुरक्षितता, शिस्त तसेच संपूर्ण कार्यक्रमातील सुरळीत सहभाग याची काळजी घेतली.
विद्यार्थ्यांनी चित्रपटाचा मनमुराद आनंद घेत उत्स्फूर्त प्रतिसाद दिला. या कार्यक्रमाचे विशेष आकर्षण म्हणजे चित्रपटातील कलाकार तसेच निर्मिती चमूतील सदस्यांसोबत आयोजित करण्यात आलेले संवादात्मक सत्र. या सत्रामुळे विद्यार्थ्यांना कलाकारांशी थेट संवाद साधण्याची आणि चित्रपट निर्मिती प्रक्रियेविषयी जाणून घेण्याची अनोखी संधी मिळाली.
विद्यार्थ्यांचा उत्साही आणि आनंदी सहभाग यामुळे ‘समर्थ’चे हे विशेष स्क्रीनिंग संस्मरणीय ठरले.
