प्राध्यापक मृत्यूप्रकरणी उपसंचालक, शिक्षणाधिकाऱ्यांसह पाच जणांवर मनुष्यवधाचा गुन्हा दाखल
मानसिक छळाच्या आरोपांच्या पार्श्वभूमीवर मालेगावचे प्राध्यापक सोपान बोरसे यांचे निधन झाले आहे. सदोष मनुष्यवधाच्या आरोपावरून पाच शिक्षण अधिकाऱ्यांविरुद्ध पोलीस गुन्हा दाखल करण्यात आला आहे.
Eduvarta
एज्युवार्ता न्यूज नेटवर्क
मालेगाव येथील महात्मा गांधी विद्यामंदिर संचलित म्युनिसिपल हायस्कूल व कनिष्ठ महाविद्यालयातील प्राध्यापक सोपान बोरसे (वय ४६) यांच्या अचानक झालेल्या मृत्यूच्या प्रकरणात नाशिकचे शिक्षण उपसंचालक, माध्यमिक शिक्षणाधिकारी यांच्यासह पाच अधिकाऱ्यांविरुद्ध शहर पोलीस ठाण्यात सदोष मनुष्यवधाचा गुन्हा दाखल करण्यात आला आहे. चौकशीच्या नावाखाली केलेल्या दमबाजी, सततच्या ससेमिरे आणि मानसिक छळामुळेच त्यांचा मृत्यू झाल्याचा आरोप नातेवाईक आणि शिक्षकांनी केला आहे. या घटनेने संपूर्ण शिक्षण क्षेत्रात खळबळ उडाली असून शिक्षकांमध्ये तीव्र असंतोष व्यक्त होत आहे.
शाळेतील कथित गैरकारभार आणि अनियमिततेच्या तक्रारींनंतर शासनाने तेथे प्रशासकाची नियुक्ती केली होती. त्यानुसार ८ सप्टेंबर रोजी जिल्हा परिषद शिक्षण विभागाचे पथक तपासणीसाठी शाळेत आले. यावेळी कनिष्ठ महाविद्यालयाचे प्रमुख असलेल्या प्रा. बोरसे यांना अनावश्यकरीत्या हजेरीपट मागितले गेले. अकरावीच्या घटक चाचणी परीक्षेदरम्यान वर्गात असलेल्या त्यांना पुन्हा बोलावून जाब विचारण्यात आला आणि सर्वांसमक्ष अपमानित करण्यात आले. या मानसिक तणावामुळे त्यांना चक्कर आली आणि ते शाळेच्या पायऱ्यांवरून खाली कोसळले. त्यानंतर त्यांचा मृत्यू झाला.
मयत प्राध्यापकांचे भाऊ प्रवीण बोरसे यांनी दिलेल्या तक्रारीत प्रशासक तानाजी घोंगडे यांनी गेल्या काही महिन्यांपासून वारंवार शाळेत येऊन गुन्हा दाखल करण्याची धमकी दिली आणि अरेरावीची भाषा वापरली असल्याचे नमूद केले आहे. १ मे २०२६ पासून प्रशासक म्हणून नियुक्त झालेल्या घोंगडे यांच्यासह माध्यमिक शिक्षणाधिकारी प्रशांत दिग्रसकर, शिक्षण उपसंचालक संजय राठोड आणि गटशिक्षणाधिकारी नीलेश पाटोळे यांच्याविरोधात कारवाईची मागणी करण्यात आली. शिक्षकांनी गुन्हा दाखल होईपर्यंत अंत्यसंस्कार न करण्याची भूमिका घेतली होती.
घटनेनंतर महात्मा गांधी विद्यामंदिर आणि आदिवासी सेवा समितीच्या शाळांमधील शिक्षकांनी तीव्र प्रतिक्रिया व्यक्त केली. गेल्या दोन वर्षांपासून शिक्षण विभागाकडून सतत चौकशीच्या माध्यमातून नाहक त्रास दिला जात असल्याचे आणि याच तणावामुळे बोरसे यांचा बळी गेल्याचे त्यांनी सांगितले. संतप्त शिक्षक आणि नातेवाईकांनी सायंकाळपर्यंत पोलीस ठाण्यात गर्दी केली होती. या दबावानंतर रात्री उशिरा गुन्हा दाखल करण्यात आला.
