नॅक मूल्यांकन न केलेल्या महाविद्यालयांवर कारवाई केली का? देवळाणकरांची विद्यापीठांना विचारणा
महाराष्ट्र सार्वजनिक विद्यापीठ अधिनियम २०१६ मध्ये महाविद्यालयाच्या नॅक मूल्यांकन आणि पुनर्मूल्यांकनाची तरतूद करण्यात आली आहे.
eduvarta@gmail.com 
एज्युवार्ता न्यूज नेटवर्क
उच्च शिक्षणाची (Higher Education) गुणवत्ता वाढावी, या उद्देशाने विद्यापीठ अनुदान आयोगाने (UGC) देशातील महाविद्यालयांना नॅक (NAAC) मूल्यांकन करण्याचे आदेश दिले होते. पण राज्यातील काही महाविद्यालये नॅक चे मूल्यांकन किंवा पुनर्मूल्यांकन करण्यात मागे आहेत. अशा महाविद्यालयांवर (College) कारवाई करण्याचे आदेश देण्यात आले होते. राज्यातील विद्यापीठांनी नॅक मूल्यांकन (NAAC Accreditation) नसलेल्या महाविद्यालयांवर काय कारवाई केली आहे, याचा अहवाल राज्याचे उच्च शिक्षण संचालक डॉ. शैलेंद्र देवळाणकर (Dr. Shailendra Deolankar) यांनी मागवला आहे.
महाराष्ट्र सार्वजनिक विद्यापीठ अधिनियम २०१६ मध्ये महाविद्यालयाच्या नॅक मूल्यांकन आणि पुनर्मूल्यांकनाची तरतूद करण्यात आली आहे. याअंतर्गत राज्यातील महाविद्यालयांनी ३१ मार्च २०२३ पर्यंत नॅक मुल्याकंन किंवा पुनर्मुल्याकंन करून घ्यावे, असे आदेश संचानालयाने दिले होते. पण नॅक च्या वेबसाईटवर राज्यातील काही महाविद्यालयांनी अद्याप मूल्यांकन किंवा पुनर्मुल्यांकनाची प्रक्रिया पूर्ण केली नसल्याचे लक्षात आल्यानंतर डॉ. देवळाणकर यांनी विद्यापीठांना या महाविद्यालयांवर कारवाई करण्याचे आदेश दिले होते.
NEP 2020 : अभियांत्रिकी पदविकेत आता योग आणि ध्यानसाधनाही, यंदापासूनच अंमलबजावणी
डॉ. शैलेंद्र देवळाणकर यांनी २३ मे रोजी परिपत्रक प्रसिद्ध करून विद्यापीठ कायद्यातील तरतुदीच्या अनुषंगाने नॅक मूल्यांकन आणि पुनर्मूल्यांकन न करणाऱ्या महाविद्यालयांची संलग्नता रद्द करण्याचे आदेश विद्यापीठांच्या कुलसचिवांना दिले होते. या पार्श्वभूमीवर शैक्षणिक वर्ष २०२३-२४ च्या प्रथम वर्ष प्रारंभ दिनांकापर्यंत नॅक मूल्यांकन आणि पुनर्मूल्यांकन न केलेल्या महाविद्यालयांची संलग्नता काढून घेण्याबाबत विद्यापीठांनी काय कारवाई केली, या बाबत शासन स्तरावर बैठक होणार आहे.
विद्यापीठांनी संबंधित महाविद्यालयांवर केलेल्या कारवाईचा अहवाल सादर करण्याचा आदेश उच्च शिक्षण संचालक डॉ. शैलेंद्र देवळाणकर यांनी राज्यातील विद्यापीठांना दिला आहे. या आदेशामुळे नॅक मूल्यांकन, पुनर्मूल्यांकन न केल्यामुळे राज्यातील किती महाविद्यालयांची संलग्नता विद्यापीठांनी खरोखरच रद्द केली, याची आकडेवारी येत्या काही दिवसांत उपलब्ध होऊ शकेल.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
