संरक्षण मंत्रालयांतर्गत नोकरीची सुवर्णसंधी! प्रकल्प अभियंता पदांसाठी भरती सुरू
आयुध निर्माण देहू रोड भरती २०२६ अंतर्गत केमिकल आणि मेकॅनिकल प्रोजेक्ट इंजिनिअर पदांसाठी नोकरीच्या संधी उपलब्ध आहेत. पात्रता, वयोमर्यादा, रिक्त जागा आणि अर्ज करण्याबाबतची माहिती तपासा.
Eduvarta
एज्युवार्ता न्यूज नेटवर्क
भारताच्या संरक्षण मंत्रालयांतर्गत येणाऱ्या म्युनिशन्स इंडिया लिमिटेडच्या महत्त्वाच्या घटकांपैकी एक असलेल्या आयुध निर्माणी देहूरोड (पुणे) येथे कंत्राटी व निश्चित कालावधीच्या आधारावर विविध रिक्त पदांसाठी भरती प्रक्रिया जाहीर झाली आहे. या मोहिमेत केमिकल आणि मेकॅनिकल ट्रेडमधील पदांसाठी पात्र उमेदवारांकडून ऑफलाइन पद्धतीने अर्ज मागविण्यात येत आहेत. ही संधी संरक्षण क्षेत्रात काम करण्याची उत्तम संधी ठरू शकते.
सुरुवातीला एक वर्षाच्या कालावधीसाठी नियुक्ती केली जाणार असून, संस्थेची गरज आणि उमेदवाराच्या कामगिरीनुसार हा कालावधी कमाल चार वर्षांपर्यंत वाढविला जाऊ शकतो. या भरतीत कार्यकाळ आधारित पदवी आणि पदविका प्रकल्प अभियंता पदांचा समावेश आहे. एकूण रिक्त जागा युआर, ओबीसी, एससी, एसटी आणि ईडब्ल्यूएस प्रवर्गांसाठी राखीव ठेवण्यात आल्या आहेत. यामुळे विविध प्रवर्गातील उमेदवारांना समान संधी मिळणार आहे.
शैक्षणिक अर्हतेनुसार संबंधित ट्रेडमधील केमिकल इंजिनिअरिंगची पदवी (बी.ई./बी.टेक.) किंवा पदविका तसेच केमिस्ट्रीसह बीएससी पदवीधर उमेदवार अर्ज करू शकतात. दारूगोळा आणि स्फोटकांच्या निर्मिती किंवा हाताळणीत अप्रेंटिसशिप पूर्ण केलेल्या उमेदवारांना प्राधान्य दिले जाईल. सामान्य प्रवर्गासाठी वयोमर्यादा ३० वर्षे असून, एससी/एसटी उमेदवारांना पाच वर्षे आणि ओबीसी-एनसीएल उमेदवारांना तीन वर्षांची शिथिलता लागू आहे.
अर्ज सादर करण्याची अंतिम मुदत एम्प्लॉयमेंट न्यूजमध्ये जाहिरात प्रसिद्ध झाल्याच्या दिनांकापासून २१ दिवसांच्या आत आहे. संपूर्ण तपशील, अर्जाचा नमुना आणि अटी-शर्तींसाठी munitionsindia.in किंवा ddpdoo.gov.in या अधिकृत संकेतस्थळांना भेट द्यावी, असे आवाहन करण्यात आले आहे.
