पालकांची प्रतीक्षा संपली : 'या' दिवशी जाहीर होणार RTE साठी सोडत 

एज्युवार्ता न्यूज नेटवर्क 

आरटीई (RTE) प्रवेशासंदर्भात पालकांसाठी महत्त्वाची अपडेट समोर आली आहे. शैक्षणिक वर्ष २०२५-२६ (Academic year 2025-26) साठी आरटीई २५ टक्के ऑनलाईन प्रवेश प्रक्रियेसाठी सोमवारी १० फेब्रुवारी रोजी दुपारी १ वाजता सोडत (RTE Online Lottery) काढण्यात येणार आहे. त्यामुळे मागील काही दिवसांपासून प्रतीक्षेत असलेल्या पालकांची अखेर प्रतीक्षा संपली आहे. त्यानंतर चार ते पाच दिवसांत म्हणजे साधारणतः १४ ते १५ फेब्रुवारीपासून पालकांना पाल्यांच्या प्रवेशाचे संदेश (Messages to parents regarding children's admission from February 14th to 15th) अर्जात नमूद केलेल्या भ्रमणध्वनीद्वारे प्राप्त होतील, अशी माहिती, शिक्षण संचालक (प्राथमिक) शरद गोसावी (Director of Primary Education Sharad Gosavi) यांनी दिली आहे. 

शिक्षण हक्क कायद्यांतर्गत २५ टक्के राखीव जागांवरील प्रवेश प्रक्रियेत राज्यातील ८ हजार ८६३ शाळांमधील १ लाख ९ हजार १११ जागांकरिता तब्बल ३ लाख ५ हजार १६१ अर्ज आले आहेत. या बालकांच्या शाळा प्रवेशासाठी अर्ज केलेल्या पालकांची शिगेला पोचलेली उत्सुकता आता येत्या सोमवारी संपणार आहे. प्राथमिक शिक्षण विभागातर्फे सोमवारी दुपारी १ वाजता ऑनलाईनद्वारे प्रवेशाची सोडत काढण्यात येणार आहे. 

बालकांचा मोफत व सक्तीच्या शिक्षणाचा अधिकार अधिनियम २००९ नुसार, दरवर्षीप्रमाणे २५ टक्के प्रवेश प्रक्रिया संपूर्ण राज्यात ऑनलाईन पध्दतीने राबविण्यात येत आहे. त्यानुसार २०२५-२६ या शैक्षणिक वर्षासाठी आरटीई २५ टक्के ऑनलाईन प्रवेश प्रक्रियेची सोडत सोमवारी पुण्यातील महाराष्ट्र राज्य शैक्षणिक संशोधन व प्रशिक्षण परिषद (विद्या प्राधिकरण) येथे दुपारी १ वाजता काढण्यात येणार आहे. या सोडतीचे थेट प्रक्षेपण व्हीसीद्वारे करण्यात येणार आहे, अशी माहिती राज्याचे प्राथमिक शिक्षण संचालक शरद गोसावी यांनी दिली.