NCERT नवीन पॅनल:  सुधा मूर्ती, शंकर महादेवन आणि संजीव सन्याल यांचा समावेश 

एज्युवार्ता न्यूज नेटवर्क  

सध्या नॅशनल कौन्सिल ऑफ एज्युकेशनल रिसर्च अँड ट्रेनिंग (NCERT) कडून इयत्ता तिसरीपासून बारावीपर्यंतच्या  अभ्यासक्रम, पाठ्यपुस्तके आणि शैक्षणिक साहित्यांना अंतिम स्वरूप देण्याचे काम सुरु आहे. यासाठी स्थापन करण्यात आलेल्या समितीमध्ये लेखिका आणि इन्फोसिस फाऊंडेशनच्या अध्यक्षा सुधा मूर्ती, (Sudha Murthy) गायक शंकर महादेवन  (Shankar Mahadevan) आणि अर्थतज्ज्ञ आणि पंतप्रधानांचे आर्थिक सल्लागार परिषदेचे सदस्य संजीव सन्याल Sanjeev Sanyal यांचा समावेश करण्यात आला आहे.

एनसीईआरटीने स्थापन केलेल्या या १९ सदस्यीय समितीमध्ये राष्ट्रीय अभ्यासक्रम आणि अध्यापन साहित्य समिती (NSTC) समितीचे अध्यक्ष राष्ट्रीय शैक्षणिक नियोजन आणि प्रशासन संस्थेचे (NIEPA) कुलपती एम. सी. पंत असतील. राष्ट्रीय शैक्षणिक धोरण (NEP) २०२० च्या अंमलबजावणीचा एक भाग म्हणून के. कस्तुरीरंगन यांच्या नेतृत्वाखालील विकसित केलेल्या नॅशनल करिक्युलम फ्रेमवर्क फॉर स्कूल एज्युकेशन (NCF-SE) सोबत नवीन अभ्यासक्रम जोडण्यासाठी ही समिती कार्य करणार आहे. प्रिन्स्टन विद्यापीठातील गणिताचे प्राध्यापक मंजुल भार्गव या समितीचे सह-अध्यक्ष आहेत. इतर सदस्यांमध्ये गणितज्ञ सुजाता रामदोराई, बॅडमिंटनपटू यू विमल कुमार, सेंटर फॉर पॉलिसी स्टडीजचे अध्यक्ष एम. डी.  श्रीनिवास आणि भारतीय भाषा समितीचे अध्यक्ष चमू कृष्ण शास्त्री यांचा समावेश आहे.

NCF-SE मध्ये गणित, विज्ञान, शारीरिक शिक्षण आणि सामाजिक विज्ञान यासह इतर  ११ डोमेनवर काम करण्यासाठी ११ CAGs तयार केले जातील. " १ हजारापेक्षा जास्त विषय तज्ञ अभ्यासक्रम विकास आणि पाठ्यपुस्तक डिझाइनिंग प्रक्रियेत काम करत आहेत. या शैक्षणिक वर्षाच्या अखेरीस ही प्रक्रिया पूर्ण करण्याचे समितीचे उद्दिष्ट असेल. त्यामुळे पुढील सत्र सुरू होण्यापूर्वी नवीन पाठ्यपुस्तके तयार होतील. NSCT च्या कार्याला पाठिंबा देण्यासाठी, NCERT ने एक राष्ट्रीय निरीक्षण समिती (NOC) देखील स्थापन केली आहे ज्याचे अध्यक्ष सेंट्रल युनिव्हर्सिटी ऑफ पंजाबचे कुलपती  जगबीर सिंग असतील, अशी माहिती NCERT च्या वतीने देण्यात आली आहे.