रेणावीकर माध्यमिक विद्यालयात नशामुक्ती प्रतिज्ञा महाअभियान
निरोगी व आनंदी जीवनासाठी चांगल्या सवयी अंगीकारून सकारात्मक जीवनशैली स्वीकारण्याचे आवाहन मान्यवरांनी विद्यार्थ्यांना केले. नशामुक्त समाजाच्या निर्मितीसाठी विद्यार्थ्यांनी स्वतः जागरूक राहून इतरांमध्येही जनजागृती करावी, असे यावेळी सांगण्यात आले.
Eduvarta
एज्युवार्ता न्यूज नेटवर्क
म. ए. सो. रेणावीकर माध्यमिक विद्यालय येथे ब्रह्माकुमारी ईश्वरीय विश्व विद्यालयाच्या वतीने ‘दहा कोटी नशामुक्ती प्रतिज्ञा महाअभियान’ अंतर्गत विद्यार्थ्यांसाठी नशामुक्ती व आरोग्यविषयक जनजागृती कार्यक्रम उत्साहात आयोजित करण्यात आला.
कार्यक्रमासाठी ब्रह्माकुमारी संस्थेच्या रश्मी दीदी, ज्ञानेश्वरी दीदी आणि नरेश भाई यांची प्रमुख उपस्थिती होती. यावेळी त्यांनी विद्यार्थ्यांना विविध व्यसनांचे शारीरिक, मानसिक आणि सामाजिक दुष्परिणाम याबाबत मार्गदर्शन केले. विद्यार्थीदशेत योग्य आहार, नियमित दिनचर्या, आरोग्याची काळजी आणि व्यसनांपासून दूर राहण्याचे महत्त्वही त्यांनी स्पष्ट केले.
निरोगी व आनंदी जीवनासाठी चांगल्या सवयी अंगीकारून सकारात्मक जीवनशैली स्वीकारण्याचे आवाहन मान्यवरांनी विद्यार्थ्यांना केले. नशामुक्त समाजाच्या निर्मितीसाठी विद्यार्थ्यांनी स्वतः जागरूक राहून इतरांमध्येही जनजागृती करावी, असे यावेळी सांगण्यात आले.
कार्यक्रमाचे सूत्रसंचालन श्री. भालसिंग सर यांनी केले. प्रशालेचे मुख्याध्यापक श्री. गवळे सर यांनी पर्यावरणपूरक उपक्रमांतर्गत उपस्थित पाहुण्यांचे रोप देऊन स्वागत केले. या माध्यमातून नशामुक्तीबरोबरच पर्यावरण संवर्धनाचा संदेशही विद्यार्थ्यांपर्यंत पोहोचविण्यात आला.
कार्यक्रमाच्या शेवटी उपस्थित मान्यवरांचे आभार मानण्यात आले. विद्यार्थ्यांनी कार्यक्रमास उत्स्फूर्त प्रतिसाद देत नशामुक्त आणि निरोगी जीवनाचा संदेश आत्मसात केला. विद्यार्थ्यांमध्ये व्यसनमुक्तीबाबत जागरूकता निर्माण करून निरोगी व सुदृढ समाज घडविण्यासाठी प्रेरणा देणारा हा उपक्रम उपयुक्त व प्रेरणादायी ठरला.
