म. ए. सो. मुलांच्या विद्यालयातर्फे पुणे पोलिसांना राखी बांधून सामाजिक रक्षाबंधन

एज्युवार्ता न्यूज नेटवर्क 

समाजाच्या सुरक्षिततेसाठी अहोरात्र कार्यरत असलेल्या पोलीस अधिकारी व कर्मचाऱ्यांप्रती कृतज्ञता व्यक्त करण्याच्या उद्देशाने महाराष्ट्र एज्युकेशन सोसायटीच्या मुलांच्या विद्यालयाच्या वतीने सामाजिक रक्षाबंधनाचा उपक्रम उत्साहात साजरा करण्यात आला.

रक्षाबंधनाचे औचित्य साधून विद्यालयातील विद्यार्थ्यांनी स्वतः तयार केलेल्या आकर्षक राख्या पुणे पोलीस अधिकारी व कर्मचाऱ्यांना बांधल्या. यावेळी विद्यार्थ्यांनी पोलिसांचे समाजातील योगदान, नागरिकांच्या सुरक्षिततेसाठी त्यांच्याकडून बजावण्यात येणारे कर्तव्य तसेच त्यागाबद्दल कृतज्ञता व्यक्त केली.

पोलिसांनीही विद्यार्थ्यांशी मनमोकळा संवाद साधत त्यांना रक्षाबंधनाच्या शुभेच्छा दिल्या. या उपक्रमामुळे विद्यार्थी आणि पोलीस प्रशासन यांच्यातील स्नेहाचे नाते अधिक दृढ झाले.

सामाजिक रक्षाबंधनाच्या या उपक्रमातून विद्यार्थ्यांमध्ये कृतज्ञता, सामाजिक बांधिलकी, शिस्त आणि जबाबदारीची भावना विकसित होण्यास मदत झाली. समाजाच्या सुरक्षेसाठी कार्य करणाऱ्या पोलीस दलाप्रती आदर व्यक्त करण्याचा हा उपक्रम सर्वांच्या मनात आनंद, आपुलकी आणि अभिमानाची भावना निर्माण करणारा ठरला.

कार्यक्रमाच्या यशस्वी आयोजनासाठी विद्यालयाचे मुख्याध्यापक श्री. वसावे, उपमुख्याध्यापिका सौ. पवार, पर्यवेक्षिका सौ. लिमये, शिक्षक श्री. दौंडकर व श्री. बुद्धिहाळ, विद्यार्थी तसेच पोलीस प्रशासन यांचे सहकार्य लाभले.