सिम्बायोसिसची विद्यार्थिनी सई थोपटे नगरसेवकपदी विराजमान

एज्युवार्ता न्यूज नेटवर्क 

राज्यातील २९ महानगरपालिकांच्या निवडणुकीचे चित्र नुकतेस स्पष्ट झाले आहे. यामध्ये पुण्यातील सिम्बायोसिस महाविद्यालयात (Symbiosis College) शिक्षण घेत असलेल्या सई थोपटे (Sai Thopte) या विद्यार्थिनीचा  (College student corporator) देखील विजय झाल्याचे समोर आले आहे. पुण्यातील प्रभाग क्रमांक ३६ मधील वार्ड क्रमांक 'क सर्वसाधारण महिला' या प्रवर्गातून तिने निवडणूक लढवत होती. यामध्ये तिने  विजय मिळावला आहे. सध्या ती पुणे महापालिकेतील (Pune Municipal Corporation) सर्वात तरुण महिला उमेदवार (Young female candidate) ठरली आहे. 

हेही वाचा - एमडी. प्रवेशाच्या नावाखाली डाॅक्टरांची लाखो रुपयांची फसवणूक, आंतरराष्ट्रीय सराईत गुन्हेगार जाळ्यात

मिळालेल्या माहितीनुसार, पुणे महापालिका सार्वजनिक निवडणूक २०२५-२६ मध्ये सई थोपटे या केवळ २२ वर्षाची तरुणी नगरसेवक म्हणून निवडणून आली आहे. सध्या ती पुण्यातील नामांकित सिम्बायोसिस महाविद्यालयात बीबीएच्या अंतिम वर्षात शिक्षण घेत आहे. रोजच्याप्रमाणे कॉलेजचा वर्ग सुरू असतानाच तिला पक्षाकडून फोन आला आणि उमेदवारी जाहीर झाल्याची माहिती मिळाली. अचानक मिळालेल्या या बातमीने सईचा आनंद गगनात मावेनासा झाला. वर्गातील मित्र-मैत्रिणींनी तिचं अभिनंदन केलं आणि त्यानंतर सई थेट आपल्या प्रभागात पोहोचली. विद्यार्थिनी असतानाच थेट निवडणुकीच्या रिंगणात उतरण्याचा हा क्षण तिच्या आयुष्यातील अत्यंत महत्त्वाचा टप्पा ठरला.

सई थोपटे गेल्या अनेक वर्षांपासून अखिल भारतीय विद्यार्थी परिषदेशी सक्रियपणे जोडलेली आहे. विद्यार्थी चळवळीच्या माध्यमातून तिने पुण्यात विविध आंदोलने, सामाजिक उपक्रम, जनजागृती कार्यक्रम आणि संघटनात्मक जबाबदाऱ्या सांभाळल्या आहेत. महाविद्यालयीन विद्यार्थ्यांचे प्रश्न, शैक्षणिक सुविधा, करिअरच्या संधी, तरुणांचे हक्क यावर तिने सातत्याने ठाम भूमिका मांडली आहे. विद्यार्थ्यांमध्ये काम करताना मिळालेला अनुभव, संवादकौशल्य आणि संघटन क्षमता यामुळेच तिचे नेतृत्व अधिक ठळकपणे पुढे आलं. आता पुणे महापालिकेत नगरसेवक म्हणून निवडून आल्याने अनेक प्रश्न मार्गी लागणार असल्याचे सांगितले जात आहेत.