NEET पेपरफुटी प्रकरण भोवलं! मनीषा मांढरे यांच्यावर कॉलेज प्रशासनाकडून निलंबनाची कारवाई

एज्युवार्ता न्यूज नेटवर्क 

नीट-युजी २०२६ (NEET-UG 2026) पेपर फुटी प्रकरणात (NEET Paper Leak Scandal) अटक झालेल्या शिवाजीनगर येथील मॉडर्न कॉलेजच्या वरिष्ठ जीवशास्त्र प्राध्यापिका मनीषा मांढरे यांच्यावर महाविद्यालय प्रशासनाने निलंबनाची (Suspension of Manisha Mandhare) कारवाई केली आहे. त्यामुळे प्राध्यापिका मांढरे यांना नीट पेपर फुटी प्रकरण चांगलेच भोवले आहे. सीबीआयने अटक (CBI Arrest) केल्याची माहिती मिळताच कॉलेजने शिस्तभंगाच्या आधारे ही दंडात्मक कारवाई (Disciplinary Action) केली. मनीषा मांढरे या गेल्या २४ वर्षांपासून मॉडर्न कॉलेजमध्ये जीवशास्त्राच्या वरिष्ठ प्राध्यापिका म्हणून कार्यरत होत्या. महाराष्ट्र खासगी शाळांतील कर्मचारी (नियमावली) १९८१ अंतर्गत त्यांच्यावर निलंबनाची कारवाई करण्यात आली आहे.

मॉडर्न कॉलेज प्रशासनाने स्पष्ट केले की, प्राध्यापिका मनीषा मांढरे यांना एनटीएने गोपनीय कामकाजासाठी तज्ज्ञ म्हणून नियुक्त केले होते. या प्रक्रियेशी किंवा प्रश्नपत्रिका निर्मितीशी महाविद्यालयाचा कोणताही थेट संबंध नव्हता. तरीही, प्रकरण गंभीर असल्याने संस्थेच्या नियमांनुसार त्वरित निलंबन करण्यात आले.

सीबीआय तपासानुसार, मनीषा मांढरे या गेल्या ५-६ वर्षांपासून एनटीएच्या परीक्षा पॅनेलवर होत्या. त्यांना वनस्पतिशास्त्र आणि प्राणिशास्त्र या विषयांच्या प्रश्नपत्रिकांचा थेट एक्सेस होता. एप्रिल महिन्यात प्राध्यापिका मनीषा मांढरे यांनी आरोपी मनीषा वाघमारे यांच्या मदतीने काही संभाव्य परीक्षार्थी विद्यार्थ्यांना पुण्यातील आपल्या निवासस्थानी विशेष शिकवणी घेतली. या वर्गात त्यांनी परीक्षेतील जसेच्या तसे प्रश्न विद्यार्थ्यांना वहीत लिहून दिल्याचा गंभीर आरोप आहे.

सीबीआयने या रॅकेटमध्ये आतापर्यंत ९ जणांना अटक केली आहे. यात लातूरचे पी. व्ही. कुलकर्णी, शिवराज मोटेगावकर याच्यासह मनीषा वाघमारे यांचा समावेश आहे. मनीषा मांढरे यांना अटक केल्यानंतर सध्या सीबीआय कोठडीत ठेवून सखोल चौकशी सुरू आहे. प्रकरणाचा सीबीआयचा तपास सुरू असून, प्रकरणात आणखी खुलासे, अटका आणि निलंबने होण्याची शक्यता आहे.