टीईटी उत्तीर्ण उमेदवारांसाठी महत्त्वाची बातमी; पात्रता प्रमाणपत्रांचे वाटप सुरू
टीईटी पात्र उमेदवारांनी आवश्यक मूळ कागदपत्रांसह त्यांनी परीक्षा दिलेल्या जिल्ह्यातील संबंधित कार्यालयाशी स्वतः संपर्क साधून आपले प्रमाणपत्र प्राप्त करावे, असे आवाहन करण्यात आले आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य परीक्षा परिषदेतर्फे टीईटी परीक्षा उत्तीर्ण उमेदवारांसाठी महत्त्वाची माहिती प्रसिद्ध करण्यात आली आहे. महाराष्ट्र शिक्षक पात्रता परीक्षा (महाटीईटी) २०२५ मध्ये पात्र ठरलेल्या उमेदवारांना त्यांच्या पात्रता प्रमाणपत्रांचे वाटप येत्या १८ मे ते ८ जून २०२६ या कालावधीत करण्यात येणार आहे, अशी माहिती महाराष्ट्र राज्य परीक्षा परिषदेच्या आयुक्त अनुराधा ओक यांनी दिली आहे.
महाटीईटी-२०२५ ही परीक्षा २३ नोव्हेंबर २०२५ रोजी राज्यभरात आयोजित करण्यात आली होती. या परीक्षेतील पेपर क्रमांक १ (इयत्ता १ ली ते ५ वी स्तर) आणि पेपर क्रमांक २ (इयत्ता ६ वी ते ८ वी स्तर) यांचा अंतिम निकाल ३ फेब्रुवारी २०२६ रोजी राज्य परीक्षा परिषदेच्या संकेतस्थळावर ऑनलाईन प्रसिद्ध करण्यात आला होता.
पात्र उमेदवारांची प्रमाणपत्रे संबंधित जिल्ह्यांच्या जिल्हा परिषद शिक्षणाधिकारी (प्राथमिक) तसेच मुंबई शिक्षण निरीक्षक (प/द/उ) यांच्या कार्यालयांकडे उपलब्ध करून देण्यात आली आहेत. त्यामुळे पात्र उमेदवारांनी आवश्यक मूळ कागदपत्रांसह त्यांनी परीक्षा दिलेल्या जिल्ह्यातील संबंधित कार्यालयाशी स्वतः संपर्क साधून आपले प्रमाणपत्र प्राप्त करावे, असे आवाहन करण्यात आले आहे.
अधिक माहितीसाठी उमेदवारांनी राज्य परीक्षा परिषदेच्या अधिकृत संकेतस्थळाला MSCE Pune भेट द्यावी, असेही स्पष्ट करण्यात आले आहे.
