सरकारचा मोठा निर्णय! राखीव प्रवर्गातील उमेदवारांना धक्का, आता खुल्या जागेवर दावा नाहीच..

एज्युवार्ता न्यूज नेटवर्क 

महाराष्ट्र राज्य मंत्रिमंडळाने (State Cabinet Meeting) सरकारी नोकऱ्यांच्या भरती प्रक्रियेत (Changes in Recruitment) महत्त्वपूर्ण आणि दूरगामी परिणाम करणारा बदल केला आहे. सामान्य प्रशासन विभागाच्या (General Administration Department) नवीन निर्णयानुसार (New decision), ज्या राखीव प्रवर्गातील उमेदवारांनी वय, शैक्षणिक पात्रता, अनुभव किंवा परीक्षेस बसण्याच्या संधीमध्ये सवलत घेतली आहे, त्यांची नियुक्ती केवळ राखीव जागांवरच होणार आहे. अशा उमेदवारांना खुल्या प्रवर्गातील रिक्त जागांवर दावा करता येणार नाही.

आज झालेल्या मंत्रिमंडळ बैठकीत हा निर्णय घेण्यात आला. यामुळे खुल्या प्रवर्गातील उमेदवारांना अधिक संधी उपलब्ध होण्याची शक्यता आहे. राज्य सरकारने स्पष्ट केले की, सवलतीचा लाभ घेतलेले राखीव उमेदवार आता फक्त आरक्षित कोट्यातील जागांसाठीच पात्र राहतील. यामुळे भरती प्रक्रिया अधिक पारदर्शक आणि योग्य गुणवत्ताधारक उमेदवारांना न्याय मिळण्यास मदत होईल, असे सरकारचे म्हणणे आहे.

याशिवाय, मंत्रिमंडळाने दोन महत्त्वाचे निर्णय घेतले आहेत. मृदा व जलसंधारण विभागात ८,७६७ नवीन पदांना मंजुरी देण्यात आली आहे. या पदांसाठी लवकरच भरती प्रक्रिया सुरू होणार आहे. तसेच, आश्रमशाळेतील शिक्षकांसाठी चट्टोपाध्याय आयोग लागू करण्याचा निर्णयही घेण्यात आला आहे, ज्यामुळे आश्रमशाळा शिक्षकांच्या वेतन, सेवा नियम आणि इतर सुविधांमध्ये सुधारणा होणार आहेत.

हा निर्णय राज्यातील लाखो युवकांच्या सरकारी नोकरीच्या आकांक्षांवर परिणाम करणारा ठरेल. विशेषतः खुल्या प्रवर्गातील उमेदवारांना याचा थेट फायदा होईल, तर राखीव प्रवर्गातील उमेदवारांना सवलतीचा लाभ घेताना आता खुल्या स्पर्धेत भाग घेण्याची मर्यादा येईल.