भारती विद्यापीठात शिष्यवृत्ती अंतर्गत लॅपटॉप वितरण; डिजिटल शिक्षणाला प्रोत्साहन
विद्यार्थ्यांनी उपलब्ध संधींचा योग्य उपयोग करून तांत्रिक कौशल्ये विकसित करावीत, नवकल्पनांना चालना द्यावी आणि तंत्रज्ञानाच्या माध्यमातून समाजासाठी योगदान द्यावे, असे आवाहन मान्यवरांनी केले.
eduvarta@gmail.com 
एज्युवार्ता न्यूज नेटवर्क
पुण्यातील भारती विद्यापीठाच्या महिला अभियांत्रिकी महाविद्यालय आय-ट्रिपल-ई (इन्स्टिट्यूट ऑफ इलेक्ट्रिकल अँड इलेक्ट्रॉनिक्स इंजिनिअर्स - IEEE) व डब्ल्यू-आय-ई (वूमन इन इंजिनिअरिंग - WIE) शिष्यवृत्ती अंतर्गत लॅपटॉप वितरण कार्यक्रम उत्साहत पार पडला. डिजिटल शिक्षणाला प्रोत्साहन देणाऱ्या या उपक्रमामुळे विद्यार्थिनींना आधुनिक तांत्रिक साधनांची उपलब्धता होणार असून त्यांच्या शैक्षणिक, संशोधन आणि कौशल्यविकासाच्या प्रवासाला नवी दिशा मिळणार आहे.
या कार्यक्रमास प्रमुख पाहुणे म्हणून आय-ट्रिपल-ई इंडिया फिलान्थ्रॉपी मॅनेजर अशोका विठ्ठल, आय-ट्रिपल-ई पुणे सेक्शनचे चेअर डॉ. अमर बुचडे तसेच आय-ट्रिपल-ई इंडियाचे कंट्री हेड चंद्रशेखरन उपस्थित होते. यावेळी विद्यार्थ्यांनी उपलब्ध संधींचा योग्य उपयोग करून तांत्रिक कौशल्ये विकसित करावीत, नवकल्पनांना चालना द्यावी आणि तंत्रज्ञानाच्या माध्यमातून समाजासाठी योगदान द्यावे, असे आवाहन मान्यवरांनी केले. सातत्याने शिकत राहणे आणि जागतिक स्तरावरील बदलांसोबत स्वतःला अद्ययावत ठेवणे ही काळाची गरज असल्याचे त्यांनी नमूद केले.
प्राचार्य डॉ. प्रदीप जाधव म्हणाले, अशा शिष्यवृत्ती उपक्रमांमुळे विद्यार्थिनींना आधुनिक तांत्रिक साधनांचा प्रभावी वापर करून शिक्षण अधिक सक्षमपणे घेता येते. महाविद्यालय विद्यार्थिनींच्या सर्वांगीण विकासासाठी सदैव कटिबद्ध असून त्यांच्या प्रगतीसाठी आवश्यक ते सर्व शैक्षणिक आणि तांत्रिक पाठबळ उपलब्ध करून देण्यात येईल, असे त्यांनी स्पष्ट केले.
सांगली, सातारा, पंढरपूर, कोल्हापूर आणि पुणे जिल्ह्यातील विविध महाविद्यालयांतील विद्यार्थिनी व शिक्षक या कार्यक्रमास उपस्थित होते. या उपक्रमांतर्गत एकूण ३० विद्यार्थ्यांना लॅपटॉपचे वितरण करण्यात आले. विद्यार्थिनींमध्ये या उपक्रमाबद्दल विशेष उत्साहाचे वातावरण पाहायला मिळाले.
या लॅपटॉप शिष्यवृत्ती अंतर्गत कशिश देवरे, साक्षी मोरे, साक्षी घोरपडे, ऋतुजा कुंठे, सिद्धी कोपर्डे, आकांक्षा मुसळे, अस्मिता ठोंबरे, सूर्यकांता कालेमपोलू, ऋतुजा चौगले, साक्षी यादव, तेजल जाधव, संध्या शेळके, आकांक्षा मुंगळे, मेघा कर्डक, वेदिका गायकवाड, काजल गाडे, प्राजक्ता साळुंखे, श्रावणी पवार, अनुष्का भोसले, गायत्री मोहिते, मंजिरी मुळीक, सौजन्य गोतिमुकुल, श्रद्धा साळुंखे, अनुजा पांडे, मेघा यादव, समीक्षा मिसाळ, तनुजा दाते, श्रेया लखेरी, तेजस्विनी यादव आणि तेजस्विनी जाधव या विद्यार्थिनींची निवड करण्यात आली.
कार्यक्रमास विजया पवार, श्वेता साळुंखे, केतकी माळगी, किरण येसुगडे, किरण नाईकवाडी, अमोल नलावडे तसेच जोशीन मार्टिन उपस्थित होते.
