CET Cell: बोर्ड परीक्षेत ४०-४५ गुण, सीईटीत १०० पर्सेंटाईल; सचिन सावंतांनी आकडेवारीच मांडली 

एज्युवार्ता न्यूज नेटवर्क 

महाराष्ट्र राज्य सामाईक प्रवेश परीक्षा (State Common Entrance Test) २०२५-२६ च्या निकालात अनेक विद्यार्थ्यांनी उत्कृष्ट कामगिरी केली आहे. काही टॉपर्संना बोर्ड परीक्षेत मिळालेल्या गुणवत्तेवर प्रश्नचिन्ह निर्माण झाले आहेत. महाराष्ट्र काँग्रेसचे सचिव आणि प्रवक्ते सचिन सावंत (Sachin Sawant) यांनी याबाबत उच्च व तंत्रशिक्षण मंत्री चंद्रकांत पाटील (Chandrakant Patil) यांना टॅग करत ट्विट केले आहे. त्यांनी या ट्विटमध्ये संपूर्ण आकडेवारीच समोर मांडली आहे. त्यामध्ये विद्यार्थ्यांच्या दहावी, बारावीच्या गुणांमध्ये आणि सीईटी गुणांमध्ये मोठा फरक समोर येत आहे. सध्या राज्यासह देशभरात नीट पेपरफुटी प्रकरण (NEET Paper Leak Scandal) गाजत असताना आता ही आकडेवारी खुप काही सांगून जात आहे. त्यामुळे सीईटी परीक्षेच्या (Doubts regarding the CET exam) पारदर्शकतेवर प्रश्नचिन्ह उपस्थित झाला आहे. 

सचिन सावंत यांच्या ट्विटनुसार, या निकालात ७ विद्यार्थ्यांना १०० पर्सेंटाईल तर १३ विद्यार्थ्यांना ९९.९९९ पर्सेंटाईल मिळाले आहेत. मात्र, अनुक्रमांक १, २, ५, ९, १३ आणि १५ या विद्यार्थ्यांचे बारावीतील पीसीएम (फिजिक्स, केमिस्ट्री, मॅथ्स) गुण केवळ ४१% ते ४९% दरम्यान आहेत. यापैकी अनुक्रमांक १, २, ५, ९ आणि १५ यांचे दहावीतील गुण ३६% ते ४५% दरम्यान होते. अनुक्रमांक ६ आणि १४ यांचे गुण अनुक्रमे ४५% आणि ४०% इतकेच आहेत. त्यामुळे या मोठ्या फरकातील गुणांमुळे शंकेला वाव मिळाला आहे. 

“दहावी-बारावीमध्ये अत्यंत सामान्य कामगिरी करणारे विद्यार्थी सीईटी सारख्या अत्यंत स्पर्धात्मक परीक्षेत अचानक १०० पर्सेंटाईल कसे मिळवू शकतात?” असा प्रश्न उपस्थित करत सचिन सावंत यांनी उच्च व तंत्रशिक्षण मंत्री चंद्रकांत पाटील यांना थेट सवाल उपस्थित करत यावर उत्तर मागितले आहे. “महाराष्ट्राच्या जनतेला तुमचे यावर मत काय आहे, हे कळले पाहिजे,” असे त्यांनी म्हटले आहे.

सीईटी ही परीक्षा अभियांत्रिकी, फार्मसी आणि इतर व्यावसायिक अभ्यासक्रमांसाठी महत्त्वाची मानली जाते. सामान्यतः बोर्ड परीक्षेत चांगली कामगिरी करणारे विद्यार्थी सीईटीमध्येही चमकतात, असे निरीक्षण आहे. मात्र, यावेळी बोर्ड गुण आणि सीईटी स्कोअर यातील मोठा फरक चर्चेचा विषय बनला आहे. काहीजण याला “कोचिंग कल्चर” आणि “स्पर्धात्मक तयारी” चा परिणाम म्हणतात, तर विरोधक यात पारदर्शकतेचा अभाव असल्याचे सांगत आहेत.

मंत्री चंद्रकांत पाटील यांची प्रतिक्रिया अद्याप समोर आलेली नाही. महायुती सरकारने या प्रकरणी अधिकृत स्पष्टीकरण द्यावे, अशी मागणी होत आहे. सीईटी सेलने निकाल जाहीर केला असून, मेरिट लिस्ट उपलब्ध आहे. मात्र, बोर्ड गुण आणि सीईटी स्कोअर यातील संबंध तपासण्याची मागणी आता जोर धरू लागली आहे.