मोठी बातमी:MPSC भरती प्रक्रियेत मोठा बदल : “Opting Out” आणि संमती विकल्प रद्द
आयोगाने भरती प्रक्रियेत मोठे बदल जाहीर केले आहेत. भरती प्रक्रियेत पारदर्शकता व कार्यक्षमता वाढविण्याच्या उद्देशाने “Opting Out” (भरती प्रक्रियेतून स्वेच्छेने बाहेर पडणे) तसेच “Give Up / Accepted” (संमती विकल्प) हे पर्याय आता पूर्णपणे रद्द करण्यात आले आहेत. हा निर्णय आजपासूनच लागू केला जाणार असल्याचे आयोगाने प्रसिद्ध केलेल्या पत्रकात स्पष्ट केले आहे.
eduvarta@gmail.com 
एज्युवार्ता न्यूज नेटवर्क
महाराष्ट्र लोकसेवा आयोगातर्फे राज्यभरातील स्पर्धा परीक्षांसाठी महत्त्वाचा निर्णय घेण्यात आला आहे.आयोगाने भरती प्रक्रियेत मोठे बदल जाहीर केले आहेत. भरती प्रक्रियेत पारदर्शकता व कार्यक्षमता वाढविण्याच्या उद्देशाने “Opting Out” (भरती प्रक्रियेतून स्वेच्छेने बाहेर पडणे) तसेच “Give Up / Accepted” (संमती विकल्प) हे पर्याय आता पूर्णपणे रद्द करण्यात आले आहेत. हा निर्णय आजपासूनच लागू केला जाणार असल्याचे आयोगाने प्रसिद्ध केलेल्या पत्रकात स्पष्ट केले आहे.
आयोगाने बुधवारी दि.१३ मे रोजी झालेल्या बैठकीत हा निर्णय घेतला आहे. आयोगामार्फत आयोजित सर्व स्पर्धा व मर्यादित विभागीय स्पर्धा परीक्षांसाठी हा निर्णय लागू असणार आहे. यापूर्वी तात्पुरत्या निवड यादीतील उमेदवारांना प्रक्रियेतून बाहेर पडण्याचा पर्याय देण्यात येत होता; मात्र आता ही सुविधा बंद करण्यात आली आहे.
दरम्यान, भरती प्रक्रियेसंदर्भात आणखी एक महत्त्वाचा बदल करण्यात आला आहे. एकल संवर्गाच्या (Single Cadre) पदांसाठी प्रतीक्षा यादी (Waiting List) कायम ठेवली जाणार असली, तरी बहुसंवर्गीय (Multi Cadre) पदांच्या भरती प्रक्रियेसाठी प्रतीक्षा यादी ठेवली जाणार नाही. तसेच, बहुसंवर्गीय भरतीत एखादा उमेदवार ज्या पदावर आधीच नियुक्त झाला आहे, त्या पदासाठी किंवा त्यापेक्षा खालच्या पदासाठी त्याने पसंतीक्रम दिला असला, तरी अशा पदांसाठी त्याचा पुढील शिफारसीसाठी विचार केला जाणार नाही, असेही आयोगाने स्पष्ट केले आहे.
