NEET पेपर फुटीतील मनीषा मांढरे मॉडर्न महाविद्यालयातून निलंबित
अध्यापनातील अनुभव लक्षात घेऊन नॅशनल टेस्टिंग एजन्सी मार्फत नीट परीक्षा संदर्भातील काही गोपनीय कामासाठी त्यांची नियुक्ती करण्यात आली होती. या नियुक्तीशी संस्था व मॉडर्न महाविद्यालयाचा कोणताही संबंध नाही. मांढरे यांचे संपूर्ण कार्य गोपनीय स्वरूपाचे आणि व्यक्ती केंद्रित होते.
eduvarta@gmail.com 
एज्युवार्ता न्यूज नेटवर्क
नीट पेपर फुटी प्रकरणी अटक करण्यात आलेल्या प्राध्यापिका मनीषा मांढरे यांना मॉडर्न महाविद्यालयातून निलंबित करण्यात आले आहे. संस्थेच्या नियमाक मंडळाची बैठक घेऊन या संदर्भातील निर्णय सोमवारी घेतला गेला असल्याचे प्रोग्रेसिव्ह एज्युकेशन सोसायटीतर्फे कळविण्यात आले आहे. तसेच मांढरे यांच्या निलंबनाबाबतची माहिती शिक्षण आयुक्त, शिक्षण उपसंचालक तसेच शिक्षण संचालक कार्यालयाकडे पाठविण्यात आली आहे. त्याचप्रमाणे सीबीआयकडून केल्या जाणाऱ्या सर्वच चौकशीला सहकार्य करण्याबाबतची भूमिका घेण्यात आली आहे.
नीट पेपर फुटी प्रकरणी मॉडर्न महाविद्यालयातील जीवशास्त्र विषयाच्या प्राध्यापिका मनीषा मांढरे यांना सीबीआयकडून अटक करण्यात आली. पेपर फुटी प्रकरण अत्यंत निंदनीय असून गंभीर व दुर्दैवी असल्याचे प्रोग्रेसिव्ह एज्युकेशन सोसायटीने नमूद केले आहे. तसेच मांढरे यांच्या संदर्भातील सविस्तर माहिती प्रसिद्ध केली आहे.
मनीषा मांढरे या शिवाजीनगर मॉडर्न कला विज्ञान आणि वाणिज्य महाविद्यालयात कनिष्ठ विभागातील शिक्षिका आहेत. 2002 पासून त्या महाविद्यालयात कार्यरत असून सुमारे 24 वर्ष इयत्ता अकरावी, बारावीच्या विद्यार्थ्यांना जीवशास्त्र विषयाचे अध्यापन करीत आहेत. त्यांचा अध्यापनातील अनुभव लक्षात घेऊन नॅशनल टेस्टिंग एजन्सी मार्फत नीट परीक्षा संदर्भातील काही गोपनीय कामासाठी त्यांची नियुक्ती करण्यात आली होती. या नियुक्तीशी संस्था व मॉडर्न महाविद्यालयाचा कोणताही संबंध नाही. मांढरे यांचे संपूर्ण कार्य गोपनीय स्वरूपाचे आणि व्यक्ती केंद्रित होते. त्यामुळे नीट पेपर प्रक्रियेशी महाविद्यालय प्रशासन किंवा संस्थेचा कोणताही संबंध नाही.
मनीषा मांढरे यांना अटक केल्याची माहिती समजल्यानंतर संस्था व महाविद्यालय स्तरावर त्याची गांभीर्याने दखल घेण्यात आली. तसेच संस्थेच्या नियमक मंडळाची याबाबत तातडीने बैठक बोलविण्यात आली. या बैठकीत मनीषा गुरुनाथ मांढरे यांचे महाराष्ट्र खाजगी शाळातील कर्मचारी (सेवेच्या शर्ती) नियमावली 1981 (MEPS) कायद्यातील नियमानुसार निलंबन करण्यात आले, असे प्रोग्रेसिव्ह एज्युकेशन सोसायटीचे कार्यवाहक शामकांत देशमुख, सहकार्यवाह डॉ. ज्योत्स्ना एकबोटे आणि मॉडर्न महाविद्यालयाच्या प्राचार्या डॉ.निवेदिता एकबोटे यांनी कळविले आहे.
