मोठी बातमी : RCC कोचिंग क्लासचे शिवराज मोटेगावकर यांना अटक
पेपर फुटी प्रकरणी लातूर कनेक्शन असल्यामुळे लातूरमध्ये गुणवत्तेच्या आधारावर विद्यार्थ्यांना प्रवेश मिळतात की पेपर फोडून विद्यार्थ्यांना गुण मिळवून दिले जातात, असा प्रश्न आता निर्माण झाला आहे.
eduvarta@gmail.com 
एज्युवार्ता न्यूज नेटवर्क
नीट पेपर फुटी प्रकरणे सुरू असलेल्या सीबीआय तपासामध्ये धक्कादायक माहिती समोर आल्यानंतर आता लातूर मधील प्रसिद्ध आरसीसी कोचिंग क्लासचे सर्वेसर्वा शिवराज मोटेगावकर यांना अटक करण्यात आली. सीबीआयने केलेल्या 11 तासांच्या चौकशीनंतर त्यांना अटक करण्याचा निर्णय घेण्यात आला. त्यामुळे महाराष्ट्रभर प्रसिद्ध असलेल्या आरसीसी कोचिंग क्लासच्या विश्वासार्हतेबद्दल प्रश्नचिन्ह निर्माण झाले आहेत.
नीट पेपर खोटी प्रकरणात पी. व्ही. कुलकर्णी यांना अटक झाल्यानंतर सीबीआयकडून मोटेगावकर यांची चौकशी करण्यात आली होती. त्यानंतर पुण्यातील मनीषा वाघमारे व मनीषा मांढरे यांना अटक करण्यात आली. सीबीआयने आपल्या तपासामध्ये मोटेगावकर यांच्या क्लास मधील विद्यार्थ्यांना मिळत असलेल्या गुणांबाबत व त्यांना आरसीसी क्लास कडून दिल्या गेलेल्या प्रश्नांबाबतची सुद्धा तपासणी केली.
महाराष्ट्रात लातूर पॅटर्न प्रसिद्ध आहे. लातूर मधील सर्वाधिक विद्यार्थी मेडिकल व इंजिनिअरिंग साठी निवडले जात असल्याचे अनेक वेळा समोर आले आहे. मात्र, पेपर फुटी प्रकरणी लातूर कनेक्शन असल्यामुळे लातूरमध्ये गुणवत्तेच्या आधारावर विद्यार्थ्यांना प्रवेश मिळतात की पेपर फोडून विद्यार्थ्यांना गुण मिळवून दिले जातात, असा प्रश्न आता निर्माण झाला आहे.
शिवराज मोटेगावकर हे महाराष्ट्रातील प्रसिद्ध रसायनशास्त्र शिक्षक असून त्यांनी 2003 मध्ये आरसीसी कोचिंगची स्थापना केली होती.या कोचिंग सेंटरच्या माध्यमातून नीट, जेईई, एमएसटी- सीईटी अशा विविध परीक्षांचे मार्गदर्शन त्यांच्याकडून केले जाते. सूत्रांकडून मिळालेल्या माहितीनुसार आरसीसी कोचिंग क्लासची उलाढाल सुमारे 100 कोटींच्या घरात आहे. 'डॉक्टर आणि इंजिनियर घडवणारी फॅक्टरी' अशाच प्रकारची जाहिरात या कोचिंग क्लासच्या माध्यमातून केली जाते.
